Niestroy, Erich. Der Trobador Pistoleta. Halle a. S.: Verlag von Max Niemeyer, 1914.

Codi: 372,002 Autor: Pistoleta Gènere: Canso Número: II

 

Anc mais nulhs hom no fon apoderatz

I	1	Anc mais nulhs hom no fon apoderatz,
		mas yeu o suy, e ren non say per que,
		qu’estiers mon grat am e suy desamatz,
		et enaissi o ai tengut ancse
	5	des que fuy natz ni saub esser amaire,
		e folley sols e no m’en puesc estraire
		e fug mon pro quec iorn e sec mon dan ;
		e fas esfortz, quar me conort ni chan.
II		Pero tant’ es la so’ humilitatz
	10	e la lauzors que tota gentz s’en te,
		qu’ieu anc no puec esser tant sos privatz
		qu’anc i trobes chausimen e merce,
		ni nulh conort don ma dolors s’esclaire,
		mas brau respos, quays qu’ieu l’ay mort son paire,
	15	e quan la prec, elha·m fai un semblan
		que no m’enten pus que un Alaman.
III		Pero tant es mos pessamens honratz
		que·l maltragz val d’autres soiorns ganre,
		tant es valens selh’a cuy me suy datz
	20	que non a par en tan quan lo mons te ;
		la genser es que anc nasques de maire
		e la meller, so aug a totz retraire ;
		per qu’ieu non l’aus descubrir mon talan
		mas per solatz, cum l’autre, en chantan.
IV	25	Mas s’ieu folley, per lieys tot m’es dintatz
		e vuelh suffrir lo mal en patz e·l be,
		qu’om non es fis ni drutz enamoratz
		ni esforsius qui tan leu si recre
		de sa dompna, ni non sap d’amor gaire,
	30	qu’anc ses afan ric gazanh no vi faire.
		ailas ! qu’ai dig ! sentirai de lieys dan,
		qu’on plus me fai languir, plus la reblan.
V		Al valen rey, qu’es de pretz coronatz
		sobr’autres reys e que mielhs se capte,
	35	on fis ioys nays et es renovellatz
		ioys e iovens, t’en vai, chansos, de se
		en Aragon, on prendon tug repaire
		bon fag valen que francx reys deia faire ;
		e saluda·m de Perpinhan enan
	40	selhs o selhas que d’amor an talan.
[VI		Pero tant es mos pensamenz honratz
		qe de ren al mas de leis no·m sove,
		e sos pres es tan fis e tan poiatz
		q’esser cug reis de ioi, can m’e[ n] sove.]