Niestroy, Erich. Der Trobador Pistoleta. Halle a. S.: Verlag von Max Niemeyer, 1914.

Codi: 372,007 Autor: Pistoleta Gènere: Canso Número: VII

 

Sens e sabers, auzirs e fin' amors

I	1	Sens e sabers, auzirs e fin’ amors
		mi fan amar leialmen ses falsura
		midonz on ai mes de bon cor ma cura,
		cum posca far e dir que·ill sia honors ;
	5	car sens la·m mostra per la plus valen
		domna del mon, vezers ab cors plus gen,
		auzirs mi fai auzir son pretz prezat,
		amors m’a·l cor plen et enamorat.
II		Tot quant eu dic entrels fins amadors
	10	posc ben proar qu’es vertatz e mesura,
		car sos bels cors, on bes non fai fraichura,
		e siei beill oill e sa fresca colors
		e tuit bon aip m’en son d’aisso guiren ;
		et ai proat per pres e per ioven
	15	que·l meiller es et ab mais de beutat
		d’autra domna, et es a dreit iuiat.
III		Per qu’eu quant venc vas vos, eu vau de cors
		tost e viatz, e no fatz desmesura ;
		e quant m’en part, vau meins que d’ambladura,
	20	pensan de vos cals es vostra valors ;
		pois regart me lai on vos es, soven,
		e dic vos mais en ver per sagramen
		que quant ab vos ai tot un iorn estat,
		lo premiers motz m’es pres del comiat.
IV	25	Bona dompna, meiller de las meillors
		e la genser, quals sera m’aventura,
		pois de totz bes mos cors ses vos endura ;
		que res ses vos no m’es gaugs ni sabors,
		pois sui vostres aissi tot leialmen
	30	que mais mi platz far vostre mandamen
		qu’ autra fezes del tot ma voluntat,
		aissi m’avez conquist e gazaingnat.
V		Domna, miei oill, que·us vezon tan soven,
		mostran al cor la beutat e·l ioven,
	35	e·l cor fai dir a la lenga de grat
		so que mei oill e·l cors s’an acordat.