Niestroy, Erich. Der Trobador Pistoleta. Halle a. S.: Verlag von Max Niemeyer, 1914.

Codi: 372,005 Autor: Pistoleta Gènere: Sirventes Número: VIII

 

Manta gent fas meravelhar

I	1	Manta gent fas meravelhar
		de mi quar no chant pus soven ;
		pero „quascus sap son afar“,
		et ieu say lo mieu eyssamen.
	5	cum chantara qui ioy non a ?
		e s’ieu chanti, qui m’auzira ?
		ni a cui platz iois ni solatz ?
		que·l plus iauzens mi par iratz
		e·l plus larcs escas e marritz,
	10	per que mos chans s’es adormitz.
II		Pauc si fai rire ab plorar,
		ni paupres d’aver ab manen,
		e nueitz escura ab iorn clar,
		e qui ren no val ab valen,
	15	e pauc cavalliers ab vila,
		ni us malautz ab autre sa,
		et erguelh ab humilitatz,
		e franquezas ab malvestatz,
		e cortes entrels descauzitz,
	20	plus qu’austors mudatz ab soritz.
III		Tals tolh que deuria donar,
		e tals cuya dir ver que men,
		e tals cuj’ autruy galiar
		que si mezeys lass’ e repren,
	25	e tals se fi’ en l’endema
		que ges no sap, s’il se veyra,
		e tals es savis apellatz
		que fay e ditz de grans foudatz,
		e tals es apellatz petitz
	30	qu’es, can s’eschai, pros et arditz.
IV		No vuelh en cort ses ioy estar
		ni ab baron desconoyssen,
		ni no m’azaut de trop ianglar
		ni de companha d’avol gen ;
	35	mas lo coms de Savoya m’a
		per amic e tostemps m’aura,
		quar elh es savis e membratz
		el ama pretz et es amatz
		el es de totz bos ayps complitz.
	40	ben aya huey aital razitz !
V		De tal suy homs que non a par
		de beutat ni d’ensenhamen,
		mas no m’en puesc gayre lauzar,
		enans en planc e·n plor soven ;
	45	e dompna si merce non a
		del sieu, doncas de cui l’aura ?
		qu’amada l’auray desamatz
		tan qu’autr’ en fora enoiatz ;
		et ieu, on pieitz mi fai ni·m ditz
	50	de mal, yeu suy pus afortitz.
VI		Dompna, estortz for’ e gueritz,
		si·l ben qu’ie·us vuelh, mi fos grazitz.