Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Estudi introductori
* Bibliografia de l'edició

* Davantal
* Bibliografia
* Testimonis
* Aparat crític
* Notes
* Traduccions
* Imatges

 

Naudieth, Fritz. Der Trobador Guillem Magret. Halle a. S.: Verlag von Max Niemeyer, 1914.

Codi: 223,004 Autor: Guilhem Magret Gènere: Canso Número: III

 

Ma dompna·m ten pres

I
1
          Ma dompna·m ten pres
   
          al costum d’Espaigna,
   
          car ma bona fes
   
          vol c’ab lei remaigna,
 
5
es eu puosc anar on me vuoill ;
   
c’a sos obs me gardon mei oill
   
e sa valors e sa beutaz.
   
Aitant val cum s’era ligaz ;
   
q’en la maiso de Dedalus
 
10
m’a mes amors aman reclus.
     
II
 
          S’estacat m’agues
   
          ab un fill d’eraigna,
   
          si tant no·ill valgues.
   
          Deu prec qe·m contraigna
 
15
(q’ades l’am mais on plus mi doill)
   
s’eu ia costa leis me despuoill !
   
C’aissi fui, qant nasquei, fadaz
   
qe tot quant l’abellis, me plaz,
   
et ilh ten m’ades en refus ;
 
20
per q’eu quant ai calt, refredus.
     
III
 
          Ab bels diz cortes
   
          couqer e gadaigna
   
          amics e plaides ;
   
          mas vas mi s’estraigna ;
 
25
q’eu vauc e veing cum l’anhaduoill,
   
enamoratz plus q’eu no suoill ;
   
mas d’aitant sui meravillaz
   
on es merces e pietaz,
   
q’eu no·m atrob ni pauc ni plus ;
 
30
et am mais e meilz que negus.
     
IV
 
          Ren al mas merces
   
          non crei que·l soffraigna,
   
          qe toz aibs i es
   
          q’a pro dompna taigna.
 
35
Humilitat a et orguoill,
   
lai on taing, e tant gent acuoill
   
q’om non es tant mal enseignaz
   
que de llei no·s parta pagaz,
   
e quant s’en es partiz chascus,
 
40
non tem q’om de null mal l’acus.
     
V
 
          Reis aragones,
   
          legatz de Romaigna,
   
          e dux e marques,
   
          e coms de Sardaigna,
 
45
gent avez esclarzit l’escuoill
   
e del froment triat lo zoill,
   
q’el loc de Saint Peir’es pausaz
   
e drechuriers reis coronaz !
   
E pos deus vos a mes lai sus,
 
50
menbre·us de nos que em za ius !

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI