Del Monte, Alberto. Peire d'Alvernha, Liriche. Torino: Loescher-Chiantore, 1955.

Codi: 323,017 Autor: Peire d'Alvernha Gènere: Vers Número: IX

 

En estiu, qan crida·l iais

I	1	En estiu, qan crida·l iais
		e reviu per miei los plais
		jovens ab la flor que nais,
		adoncs es razos c’om lais
	5	fals’amor enganairitz
		als volpillos acropitz:
II		Li sordeior e·il savais
		n’an lo mieills e·l meins del fais:
		pauc so prezon, qui·s n’irais.
	10	Amarai, mas non puosc mais
		que de tal amor sui guitz
		don sai que serai trahitz.
III		Pres ai estat en caslar,
		ab so que no·l aus estar,
	15	e pero non puosc mudar
		de mos enemics no·l gar;
		ja non serai assaillitz,
		q’en auta roch’ es bastitz.
IV		Si·l portiers me vol iurar
	20	c’autre non i lais intrar,
		segur poirai gerreiar;
		mas al sagramen passar
		tem que serai escarnitz,
		que mil vetz i sui faillitz.
V	25	Lai sui plevitz e iuratz
		q’ieu non am ves autre latz,
		mas d’aisso es grans pechatz
		q’eu am e non sui amatz;
		totz temps ai fag plaitz e ditz
	30	per q’eu sui gen acuillitz.
VI		A Dompnidieu qier solatz
		per q’ieu si’ enamoratz,
		q’en aital hora fui natz
		c’anc non puoc amar en patz,
	35	e platz mi car sui issitz
		de la terr’ on fui noiritz.
VII		Amor mi lais Dieus trobar
		on ia no·m posc afiar,
		e qant ieu la tenrai car,
	40	ill pens de mi enganar;
		c’adoncs mi tenc per garitz,
		qan mi ment tot cant mi ditz.
VIII		Assatz a a cavalgar
		qui la cuid’ autra trobar,
	45	c’aissi co·l cels clau la mar,
		non pot hom gaire trobar
		que non sion camiairitz
		vas drutz e vas lor maritz.
IX		Totz temps deu esser marritz
	50	qui d’aital amor es guitz.