Appel, Carl. Das Leben und die Lieder des trobadors Peire Rogier. Berlin: Druck und Verlag von G. Reimer, 1882.

Codi: 389,034 Autor: Raimbaut d'Aurenga Gènere: Vers (de réponse) Número: 8A

 

Peire Rogier, a trassalhir

I	1	Peire Rogier, a trassalhir
		m’er per uos los ditz e·ls couens,
		qu’ieu fis a midons totz dolens,
		de chantar que·m cuygey sofrir ;
	5	e pus sai n’etz a mi uengutz,
		chantarai si n’ai estat mutz,
		que non uuelh remaner cofes.
II		Mout uos dei lauzar e grazir,
		quar anc uos uenc cors ni talens
	10	de saber mos captenemens,
		e uuelh que·n sapchatz alques dir ;
		e ia l’auers no·m sia escutz,
		s’ieu suy auols ni recrezutz,
		que pel uer non passetz ades.
III	15	Quar qui per auer uol mentir,
		aquelh lauzars es blasmamens
		e tortz e mais essenhamens,
		e fai·s als autres escarnir,
		qu’en digz non es bos pretz sauputz,
	20	mais els fagz es reconogutz,
		e pels fagz ueno·l dig apres.
IV		Per mi uoletz mon nom auzir,
		quals sui o drutz ; er clau las dens,
		qu’ades pueja mos pessamens,
	25	on pus de preon m’o cossir ;
		ben uuelh sapchatz que no suy drutz
		tot per so quar no suy uolgutz,
		mas ben am, sol midons m’ames.
V		Peire Rogier, cum puesc sufrir
	30	que ieu am aissi solamens ?
		merauilh me s’iesc uius d’auens ; —
		tortz es si·m fai midons murir. —
		s’ieu muer per lieys faray uertutz,
		per qu’ieu cre que, s’i fos perdutz,
	35	dreitz fora, que plus m’enoges.
VI		Ara·l uen en cor que m’azir,
		mas ia fo qu’er’autres sos sens
		qu’aitals, e-ssos entendemens,
		per qu’ieu li dey totz temps seruir ;
	40	pel ben que·m n’es escazegutz,
		iamais no·m n’auengues salutz,
		li dey tostemps estar als pes.
VII		Si·m uolgues sol tan cossentir
		que fos tostemps sos entendens,
	45	ab belhs digz n’estera iauzens,
		e fera·m ses fagz esiauzir ;
		e degra·n ben esser crezutz,
		qu’ieu non dic tan que·m fos creguz
		mas d’un bon respieg don uisques.
VIII	50	Bon respieg, d’aut bas son cazuz,
		e si no·m erep sa uertutz,
		per cossel li do, que·m pendes.