Appel, Carl. Das Leben und die Lieder des trobadors Peire Rogier. Berlin: Druck und Verlag von G. Reimer, 1882.

Codi: 009,011 Autor: Aimeric de Belenoi Gènere: Canso Número: I

 

Ja no creyray q'afanz ne cossirers

I	1	Ja no creyray q’afanz ne cossirers
		ne grieus sospirs nj plaigners nj plorars
		ne grantz trebaillz ne fiers maltraich sobrers
		ne loncs desirs n’endura ne ueillars
	5	hajon poder de nul home aucir,
		ni per amor puosca nuillz hom morir,
		qar jeu no muor, e mos mais es tan grieus,
		per qu’ieu no crej q’anc en moris n’Andrieus.
II		Q’anch nuls amanz ne nuls penedenchers
	10	no trais lo mal ne la dolor, nj l’ars,
		q’ieu haj soffert plus de cinc ansz entiers
		per lei, a cui amors nj mercejars
		no ual siuals d’aitan, qe no·m aїr
		lo sieus gens cors, car jeu m’aus enardir
	15	de leis amar, qe uoill mais esser sieus,
		que senes lej lo montz sia totz mieus.
III		Qar tant m’es dolsz de leis lo deszirers,
		plus qe d’autra lo jasers ne·l baisars,
		q’ieu estauc chaj sos paubres soudaders
	20	e·n laiss ma terra e mantz de ricx afars,
		qar senes leis no puosc rix deuenir,
		mas si·ll plagues, ela·m pogr’enrichir ;
		q’aqel rich joj de s’amor mi des, dieus !
		lo rejs Felips tenria pueis mos fieus.
III	25	Tan es sos prez uerais e dreichurers
		e·l sieus gajs cors onratz e fins e cars,
		qi·n parlaria scemblaria ufaners,
		q’aissj con coill totas aiguas la mars,
		sab tot bo pretz retener e chausir ;
	30	e en totz temps hom no poria dir
		la gran beltat nj escriure en brieus
		del sieu cors clar plus qe rosa ni neus.
IV		Domna·l uostr’hom liges endomengers
		e·l uostre sers humils en totz honrars
	35	e·l uostre amicx leialx e uertaders,
		q’en be amar non l’er ja trobatz pars,
		vos qier per dieu, destreich ab gran deszir,
		qe no·l fachasz plus desiran languir ;
		qar meiller es onrada amors en brieus
	40	qe lonc trebaill, e per soffrir plus lieus.
V		Domna, per dieu no credasz lausengers,
		ni·m tenga dan ab uos lo deuinars,
		q’ieu non soj ges d’aqels amantz leugers,
		qe·s uan gaban, a cuj noz trop parlars ;
	45	ansz uoill mon cor tant celar e cobrir,
		qe s’ieu tot mor, no·us uej nj uos remir ;
		pels fals desfaitz pejors qe canjneus
		m’estrag de uos e muou ues autres treus.
V		Bona domna, per uos plang e sospir,
	50	e qant de uos me conuen a partir,
		no presera tot lo contat d’Angieus,
		q’eu no annes per uostr’amor romjeus.
VI		Franch reis gentils d’Aragon, gran deszir
		haj q’ieu uos ueja las armas baillir,
	55	qar crestians, saracins ne judjeus
		tan ricx afars no saup far bons e lieus.
VII		La contessa de Sobiraz sab dir
		e far plaszer, per q’hom no·s deu soffrir
		de sa lausor ; tan l’ha onrada dieus,
	60	qe totz prez ual, mais de midonz, lo sieus.