Appel, Carl. Das Leben und die Lieder des trobadors Peire Rogier. Berlin: Druck und Verlag von G. Reimer, 1882.

Codi: 032,001 Autor: Arnaut Plagues Gènere: Canso Número: II

 

Ben uolgra midons saubes

I	1	Ben uolgra midons saubes
		mon cor ayssi cum yeu·l say,
		e que·l plagues qu’ieu fos lay,
		on es sos guays cors cortes
	5	e si dic sobransaria ? —
		diguas. — e cuias que sia ?
		yeu no, que no·m sent tan ricx. —
		suefre e no t’amendicx,
		que de ben leu s’auenria.
II	10	Avenir deu ? no pot ges. —
		no pot lo? per dieu, si fay. —
		e quom ? — yeu uos o diray. —
		diguatz cum. — s’a lieys plagues. —
		plazer ? a lieys cum plairia ? —
	15	leuet, s’amors o uolia. —
		amors ! — yest li enemicx ? —
		yeu no, ans estauc enicx
		a quascun que la gualia.
III		Suefre e uenra t’en bes. —
	20	e cum ? que·ls mals ades n’ay. —
		mals ? non ho diguas iamay. —
		e per que ? — quar no i es. —
		non es mals qu’aissi m’aucia
		languen ? — non ges, quar un dia
	25	er tos bes, si non t’en gicx,
		ab sol que no la cambicx. —
		e morray ?! — oc, si·s uolia.
IV		Si·s uol ? — oc. — ualra·m merces
		ab lieys ? — per dieu, non o say. —
	30	e per que ? — quar non s’eschai,
		que trop t’iest en ric luec mes. —
		ric, per crotz, ben o sabia. —
		e doncx no fezist follia ?
		laissa t’en ! — no m’en casticx,
	35	qu’aisso no t’es mas destricx,
		que ges no m’en laissaria.
V		No t’en laissarias ges ? —
		non yeu. — doncx aissi o fay,
		cum ieu t’o ensenharai :
	40	sias adreitz e cortes ;
		francx e de bella paria,
		e fay so que ben estia,
		quan poiras, e non t’en tricx,
		qu’aissi deu renhar amicx ; —
	45	oc, e mielhs si mielhs podia.
VI		Na Felipa, s’ieu auia
		tals rictatz don ieu fos ricx,
		atressi·us seri’ amicx
		de ben dir si cum solia.
VII	50	Chanso, en Castella ten uia
		al rei qu’adoba·ls destricx,
		qu’om pren ab los auols ricx,
		quant es en lor companhia.