Appel, Carl. Das Leben und die Lieder des trobadors Peire Rogier. Berlin: Druck und Verlag von G. Reimer, 1882.

Codi: 225,011 Autor: Guilhem de Montanhagol Gènere: Sirventes Número: IV

 

On mais a hom de ualensa

I	1	On mais a hom de ualensa,
		mielhs si deuria chauzir,
		no fezes desconoyssensa ;
		quar hom pros pot leu falhir,
	5	e·l maluatz al mieu albir
		no falh, quan fai fallimen,
		quar per deuer yssamen
		fan li maluat malestan,
		quon fan bos fagz li prezan.
II	10	Ges del segle no m’agensa,
		quan n’aug als maluatz mal dir,
		qu’ilh cujon la lur falhensa
		ab lo lur mal dig cubrir ;
		e dona lur dieus culhir
	15	quadan pro ui e fromen,
		et an pro aur et argen,
		e ia ren be no metran,
		ans ualon meyns, on mais an.
III		Dieus, quon pot auer sufrensa
	20	ricx hom de gent aculhir
		ni de far guaya paruensa,
		ni quo·s pot de dar tenir,
		quan ben o pot mantenir !
		mout hi fetz dieus son talen,
	25	quar non donet largamen
		a selhs que larguamen dan,
		e pauc a selhs que pauc fan.
IV		Mas ia melhur’om e gensa
		en raubas et en guarnir
	30	et en manhta captenensa,
		e·s uol hom trop gent tenir ;
		mas en dar et en seruir
		no uey far melhuramen.
		e doncx, que·us faretz, manen ?!
	35	ia morretz uos quan que quan,
		gardatz que·l temps no·us enjan !
V		Coms Cumenges, ses temensa
		poiri’om a uos uenir,
		que·l sobrenoms es guirensa
	40	de uos, qui·l sap deuezir,
		don paubres deu enriquir ;
		qu’aissi quon crezon crezen
		en cumenjar saluamen,
		deu Cumenges ualer tan,
	45	que salu aquels que·l creiran.
VI		Emperaire, pretz ualen
		auetz e ualor e sen,
		e quar sabetz ualer tan,
		en uos uuelh daurar mon chan.
VII	50	Na Guiza, ges no·m repen
		de uos lauzar, quar m’es gen ;
		mas dels uostres tan ni quan
		no·m laus, s’enquer mielhs no·m fan.