Loporcaro, Michele. Due poesie di Guilhem de Saint Gregori (BdT. 233.2 e 233.3). "Medioevo Romanzo", XV (1990), pp. 17-60.

Codi: 233,002 Autor: Guillem de Saint Gregori Gènere: Sirventes Número: I

 

Ben grans avolesa intra

I	1	Ben grans avolesa intra
		a N’Aemar entre la charn e l’ongla,
		e si a·n pres aiz’ el cor iosta l’arma
		e malvestatz bat l’ades de sa veria.
	5	Mal resembla al bon prebost son oncle,
		en cui bons pretz fai per soiorn sa chambra.
II		N’Aemars fai lum en chambra
		de sef ardent quan a privat se·n intra.
		Anc re non tais al bon pretz de son oncle,
	10	qe cors e senz l’es partitz totz per l’ongla.
		Vist l’agues eu mesurar d’una veria
		vas on fos mes lo cors que destrui l’arma!
III		Eu non plaing lo cors ni l’arma,
		mas la terra on bos pretz pert sa chambra:
	15	qe n’Aemars l’a tant batut ab veria,
		e degitat de totz los locs on intra,
		q’ab lui non pot metre ni pel ni ongla,
		mas ben floris e grana ab son oncle.
IV		Per bon e per ric teing l’oncle,
	20	e·l neps es tals qe no·i a ren mas l’arma:
		flacs e volpils del cim tro bas en l’ongla,
		e malvestatz es sa cortz e sa chambra.
		Ha, coms savais, cel q’en grant amor intra
		de ren ab vos es tochatz d’avol veria!
V	25	Be·m segnei ab bona veria
		lo iorn q’ieu vinc al bon prebost son oncle.
		E s’ieu intres sovent lai on el intra
		mais en valgra totz temps mos cors e m’arma:
		q’ab ferm voler met bon pretz dinz sa chambra
	30	et es ab lui aissi cum charns et ongla.
VI		Lai vas Mon Berart vir l’ongla,
		q’anc non batet ni feri de sa veria
		pretz ni ioven ni·l gitet de sa chambra;
		e membra·m ben e son pair’ e son oncle.
	35	S’ab ferm voler de tot bon pretz non s’arma,
		plus perdutz es q’arma q’en enfern intra.
VII		Sirventes faz per ongla e per oncle
		[a n’Aemar,] per ver[ia e per arma,
		e al prebost, per chambra e per intra].