Ricketts, Peter T. Les poésies de Guilhem de Montanhagol, troubadour provençal du XIIIe siècle. Toronto: Pontifical Institute of Mediaeval Studies, 1964.

Codi: 225,011 Autor: Guilhem de Montanhagol Gènere: Sirventes Número: V

 

On mais a hom de valensa

I	1	On mais a hom de valensa,
		mielhs si deuria chauzir
		no fezes desconoyssenssa.
		Quar hom pros leu pot falhir,
	5	e·l malvatz, al mieu albir,
		no falh, quan fai falhimen,
		quar per dever yssamen
		fan li malvat malestan
		com fan bos fagz li prezan.
II	10	Ges dels valens no m’agensa
		quan n’aug als malvatz mal dir,
		qu’ilh cujon la lur falhensa
		ab los lur mals digz cubrir;
		e da lor Dieus a culhir
	15	quad’an pro vi e fromen
		e an pro aur e argen;
		e ja re·n be no metran
		ans valon meyns on mais an.
III		Dieus, com pot aver sufrensa
	20	ricx hom de gent aculhir
		ni de far guaya parvensa
		ni co·s pot de dar tenir
		quan ben o pot mantenir ?
		Mout hi fetz Dieus son talen,
	25	quar non donet largamen
		a sels que largamen dan
		e pauc a sels que pauc fan.
IV		Mas ja melhur’om e gensa
		en raubas e en guarnir
	30	e en manhta captenensa,
		e·s vol hom trop gent tenir.
		Mas en dar ni en servir
		no vei far melhuramen.
		E doncx que·us faretz, manen ?
	35	Ja morretz vos, can que can ;
		gardatz que·l temps no us engan.
V		Coms Cumenges, ses temensa,
		poiri’om a vos venir,
		que·l sobrenoms es guirensa
	40	de vos, qui·l sap devezir,
		don paubre·s deu enriquir.
		Qu’aissi com crezon crezen
		en cumenjar salvamen,
		deu Cumenges valer tan
	45	que salv aquels que·l creiran.
VI		Emperaire, pretz valen
		avetz, e valor e sen,
		e quar sabetz valer tan
		en vos vuelh daurar mon chan.
VII	50	Na Guiza, ges no·m repen
		de vos lauzar, quar m’es gen;
		mas dels vostres tan ni quan
		no·m laus, s’enquer mielhs no·m fan.