Ricketts, Peter T. Les poésies de Guilhem de Montanhagol, troubadour provençal du XIIIe siècle. Toronto: Pontifical Institute of Mediaeval Studies, 1964.

Codi: 225,009 Autor: Guilhem de Montanhagol Gènere: Canso Número: VI

 

No sap per que va son joy pus tarzan

I	1	No sap per que va son joy pus tarzan,
		ni fug ni gan
		dompn’a son amador,
		pus lo conoys be per bo servidor
	5	senes error
		en fag et en semblan.
		Quar trop tarzar en dompney es follia,
		que mans amicx ne ven en dezesper,
		quar pueys no·s deu dompna de ren temer,
	10	pus ve l’amor ses fench’e ses bauzia.
II		Bona dompna, ab bel cors benestan,
		vos tray enan
		beutatz part la gensor,
		e·us fai valer valors part la melhor.
	15	Pro·us fan d’onor,
		per so faitz lur coman :
		valors vos ditz que fassatz ben tot dia,
		et amors vol qu’ametz, non per dever,
		mas lo plus fi, ab qu’aya meyns poder :
	20	qu’on meyns er ricx, mais vos o graziria.
III		Triat vos ai, dompna, mi ses enjan,
		de bon talan,
		que ben gar vostr’onor,
		si cum triet si ad emperador
	25	senes temor
		ja Fredericx antan :
		si eis s’i mes, quar hom tan no y valia.
		Atressi·us dic qu’om mi no y pot valer,
		quar res, dompna, tan no·us ama per ver ;
	30	per so·us valh mais ieu qu’autre no faria.
IV		Ben pot chauzir dompn’un sol fin aman
		ses malestan,
		son par o pauc major;
		pero no falh, si chauzis en menor,
	35	si·l ve valor
		sol non pes lo baran ;
		quar lo plus bas li grazis tota via,
		mais que·l plus ricx ni·l pars, si·l fa plazer,
		per que·l deu mielhs dompn’ab si retener
	40	quar mais i a poder e senhoria.
V		Per ver vos jur, dompna, e·us pliu e·us man,
		qu’ieu non am tan
		ren cum vos, cuy honor ;
		per que·n laissi mans bels plazers d’alhor.
	45	Pro y fas folor,
		mas be·m podetz aitan,
		o neis cen tans esmendar, si·us plazia ;
		pero ueymais vos deuria plazer.
		Per que no·us platz, dompna ? Qu’ieu fas saber
	50	qu’atressi·us er a far, coras que sia.
VI		N’Esclarmunda, vostre noms signifia
		que vos donatz clardat al mon per ver
		et etz monda, que no fes non dever ;
		aitals etz plan com al ric nom tanhia.