Ricketts, Peter T. Les poésies de Guilhem de Montanhagol, troubadour provençal du XIIIe siècle. Toronto: Pontifical Institute of Mediaeval Studies, 1964.

Codi: 225,006 Autor: Guilhem de Montanhagol Gènere: Canso Número: VII

 

Leu chansoneta m'er a far

I	1	Leu chansoneta m’er a far,
		pus n’ay man de ma douss’amia,
		qu’estiers non la vuelh ja chantar,
		quar no plai joys ni cortezia
	5	als ricx, tan son tornat avar ;
		mas per elhs no m’en dey laissar,
		qu’ieu n’ai pro, s’a midons plazia.
II		Pro n’ai ieu, sol midons m’ampar ;
		per qu’avols ricx no blandiria,
	10	pus que no·s volon esmendar
		dels croys faitz que fan quascun dia,
		e no·s ne podon castiar,
		e pueys pesson de dompneyar
		per qu’en pren a mon cor feunia.
III	15	D’aisso fan dompnas a blasmar
		quar joys se pert e pretz ten via,
		que si·lhas volguesson amar,
		lo mon fora guays cum solia,
		e·l cavalier tengran se car
	20	e volgra quecx son benestar ;
		mas tot torna en trichairia.
IV		D’elhs no·m cal, sol que Dieus me gar
		midons e·m do so qu’en volria.
	25	Mas elha no·m pot ren donar,
		tan suy sieus que·l dos remanria
		sieus, cum seria enans del dar,
		qu’ieu non ai cor ni ren tan car
		ni aurai, que tot sieu no sia.
V	30	Al valen rey que·s fa lauzar
		d’Arago, chanso, te y ta via,
		qu’elh es reys que sap ben regnar,
		vas Dieu, vas pretz, si no·s cambia;
		mas d’aysso·s sapcha·l reys gardar,
	35	que Dieus e pretz son d’aitan par,
		qu’ades los pert qui·s ne desvia.
VI		N’Esclarmonda sal Dieus e gar,
		qu’es de fina beutat ses par
		e de guaya, plazen conhdia.
VII		Le noms ditz qui·l sap declarar,
	40	qu’es clar’e munda de follia.