Ricketts, Peter T. Les poésies de Guilhem de Montanhagol, troubadour provençal du XIIIe siècle. Toronto: Pontifical Institute of Mediaeval Studies, 1964.

Codi: 225,002 Autor: Guilhem de Montanhagol Gènere: Canso Número: XII

 

Ar ab lo coinde pascor

I	1	Ar ab lo coinde pascor,
		qan vei de bella color
		flors per vergiers e per pratz,
		e aug chantar daus totz latz
	5	los auzeletz per doussor,
		vueilh far ab coindia
		chanso tal qe sia
		plazens als enamoratz,
		e a midons majormen
	10	qe·m don’en trobar engenh.
II		Ben devon li amador
		de bon cor servir amor,
		qar amors non es peccatz,
		anz es vertutz qe·ls malvatz
	15	fai bons, e·ll bo·n son meillor,
		e met hom’en via
		de ben far tot dia ;
		e d’amor mou castitatz,
		qar qi·n amor ben s’enten
	20	non pot far qe pueis mal renh.
III		E pos tant a de valor
		amors, ben fan gran follor
		las donnas on es beutatz,
		qar non amon los prezatz
	25	pos o conoisson en lor;
		qar pueis lor plairia
		jois e cortezia
		e chans e totz bels solatz ;
		mas greu faran tan de sen
	30	s’amors no las i empenh.
IV		Amors, de vos fatz lauzor,
		q’amar mi fatz la gensor,
		don mi son tan aut pujatz
		qe·l morirs neis m’es onratz,
	35	tan es de nobla ricor;
		e s’ieu joi n’avia,
		sai qe non morria,
		anz viuria gen pagatz.
		Si non l’ai, morrai breumen,
	40	q’ieu l’am tan, qe·l cor m’estenh.
V		Qi ve la fresca color
		de vos, bella, cui ador,
		e·ls uelhs vairs e·ls cilhs delgatz
		.........................................
	45	de natural resplandor,
		totz hom pert feunia,
		qi·us esgar’, amia.
		E ieu, las, a cui mais platz,
		mueir, qan vei vostre cors gen,
	50	d’enveia, tan mi destrenh.
VI		Fis pretz deschairia,
		si no·l sostenia
		le reis Castellans onratz,
		qe fai totz sos faitz tan gen,
	55	q’en ren non cal q’om l’ensenh.