Longobardi, Monica. I vers del trovatore Guiraut Riquier. "Studi Mediolatini e Volgari", 29 (1982-1983), pp. 17-163.

Codi: 248,030 Autor: Guiraut Riquier Gènere: Vers Número: XVIII

 

Fortz guerra fai tot lo mun guerreiar

		LO XVIIII VERS D'EN GR. RIQUIER, L'AN MCCLXXXV, LO JORN DE SANT BRES.
I		Fortz guerra fai tot lo mun guerreiar
		e destruir, per que tost er destrutz,
		qu'ab totz esfortz vey las gens esforsar
		de dechazer us autres, dechazutz
	5	de drechura, qu'us non es drechuriers,
		ans es ab tort qui pot, pus torturiers,
		tant que temors de Dieu no·y fa temensa,
		e qui conoys mescre sa conoyssensa.
II		Per que·l mons es estranhatz de mundar,
	10	quar hom no cre autre ni es crezutz,
		ni es amatz per ren ni pot amar
		ni ben voler, ans es totz mais volgutz;
		qu'om dona dreg, dat per Dieu, per deniers
		e per aver avera·ls messongiers.
	15	Per que Dieus fa ses pro far penedensa
		als crestïas crestatz de pacïensa.
III		Q'us ab son par no·s pot apariar
		ses decebre, don quecx es deceubutz
		e galiatz, tan vol quecx galiar
	20	creyssen lo sieu; don mals es tant cregutz
		qu'om no vol far ben e fa volentiers
		mal, per que patz nos fug, que·l vers paziers
		par que nos falh per la nostra falhensa,
		e no nos val quar nos no·l faym valensa.
IV	25	Mas qui fes totz los bes que pogra far,
		e que·s tengues dels mals on es tengutz,
		ez oblides so que deu oblidar,
		e decores de cor so qu'es salutz,
		e volgues dreg, quar dreitz es dreitz semdiers,
	30	qu'aissi viven viu hom e non estiers,
		ez obezis so qu'es d'obedïensa,
		de belh saber agra belha sabensa.
V		Vers paires Dieus, don no·ns podem pairar,
		vera via, vertatz e vera lutz,
	35	vers salvamens per que·ns devem salvar,
		vera bontatz, don totz bes es vengutz,
		amaires vers als amadors entiers,
		defendemens defendens d'aversiers,
		faitz nos obrar tals obras ab crezensa,
	40	qu'entre·ls gueritz trobera ab vos guirensa.
VI		Amples camis ab trops de caminiers,
		leus per saber e per tener leugiers
		es selh de mort, e mortals ab temensa
		selh de vida, per qu'a paucx vius agensa.
VII	45	Si be·m falhic, no crey que fes falhensa
		mos Belhs Deportz: deport truep e guirensa.