Coulet, Jules. Le troubadour Guilhem Montanhagol. Toulouse: Imprimerie et Librairie Édouard Privat, 1898.

Codi: 225,006 Autor: Guilhem de Montanhagol Gènere: Canso Número: VI

 

Leu chansoneta m'er a far

I	1	Leu chansoneta m'er a far,
		Pus n'ay man de ma douss'amia,
		Qu'estiers no la vuelh ja chantar,
		Quar no plai joys ni cortezia
	5	Als ricx, tan son tornat avar;
		Mas per els no m'en dey laissar,
		Qu'ieu n'ai pro, s'a midons plazia.
II		Pro n'ai ieu, sol midons m'ampar;
		Per qu'avols ricx no blandiria,
	10	Pus que no·s volon esmendar
		Dels croys faitz que fan quascun dia
		E no·s ne podon castiar,
		E pueys pesson de dompneyar
		Per qu'en pren a mon cor feunia.
III	15	D'aisso fan dompnas a blasmar
		Quar joys se pert e pretz ten via,
		Que si'las volguesson amar,
		Lo mons fora guays cum solia,
		E·lh cavayer tengran se car
	20	E volgra quecx son benestar;
		Mas tot torna en trichairia.
IV		D'els no·m cal, sol que Dieus me gar
		Midons e·m do so qu'en volria.
		Mas ela no·m pot res donar,
	25	Tan suy sieus, que·l dos remanria
		Sieus, cum seria enans del dar,
		Qu'ieu non ai cor ni ren tan car
		Ni aurai, que tot sieu no sia.
V		Al valen rey, que.s fa lauzar,
	30	D'Arago, chanso, te y ta via,
		Qu'el es reys que sap ben regnar
		Vas Dieu, vas pretz, si no·s cambia;
		Mas d'aysso·s sapcha·l reys gardar,
		Que Dieus e pretz son d'aitan par
	35	Qu'ades los pert qui·s ne desvia.
VI		N' Esclarmonda sal Dieus e gar,
		Qu'es de fina beutat ses par
		E de guaya, plazen conhdia.
		Le noms ditz, qui·l sap declarar,
	40	Qu'es clar' e munda de follia.