Coulet, Jules. Le troubadour Guilhem Montanhagol. Toulouse: Imprimerie et Librairie Édouard Privat, 1898.

Codi: 225,009 Autor: Guilhem de Montanhagol Gènere: Canso Número: IX

 

No sap per que va son joy pus tarzan

I	1	No sap per que va son joy pus tarzan
		Ni fug ni gan      domna son amador,
		Pus lo conoys be per bo servidor
		Senes error      en fag et en semblan;
	5	Quar trop tarzar en dompney es follia,
		Que mans amicx ne ven eu dezesper,
		Quar pueys no·s deu dompna de ren temer,
		Pus ve l'amor ses fench' e ses bausia.
II		Bona dompna ab bel cors ben estan,
	10	Vos trai enan      beutatz part la gensor,
		E·us fai valer valors part la melhor.
		Pro·us fan d'onor,      per so faitz lur coman:
		Valors vos ditz que fassatz ben tot dia,
		Et amors vol qu'ametz, non per dever,
	15	Mas lo plus fi, ab qu'aya meyns poder:
		Qu'on meyns er ricx, mais vos o graziria.
III		Triat vos ai, dompna, mi ses enjan,
		De bon talan,      que ben gar vostr' onor,
		Si cum triet si ad emperador
	20	Senes temor      ja Fredericx antan:
		Si eys s'i mes, quar om tan no y valia.
		Atressi·us dic qu'om mi no y pot valer,
		Quar res, dompna, tan no·us ama per ver;
		Per so·us valh mais ieu qu'autre no faria.
IV	25	Ben pot chauzir dompn' un sol fin aman
		Ses malestan,      son par o pauc major;
		Pero no falh, si chauzis en menor,
		Si·lh ve valor,      sol non pes lo baran;
		Quar lo plus bas li grazis tota via
	30	Mais que·l plus ricx ni·l pars, si·lh fa plazer,
		Per que·l deu mielhs dompn' ab si retener
		Quar mais i a poder e senhoria.
V		Per ver vos jur, domna, e.us pliu e.us man
		Qu'ieu non am tan      res cum vos, cuy onor;
	35	Per que·n laissi mans bels plazers d'alhor.
		Pro y fas folor,      mas be·m podetz aitan,
		O neys cen tans, esmendar, si·us plazia;
		Pero ueymais vos deuria plazer.
		Per que no·us platz, dompna? Qu'ie·us fas saber
	40	Qu'atressi·us er a far, coras que sia.
VI		N'Esclarmunda, vostre noms signifia
		Que vos donatz clardat al mon per ver
		Et etz monda, que no fes non dever:
		Aitals etz plan com al ric nom tanhia.