Longobardi, Monica. I vers del trovatore Guiraut Riquier. "Studi Mediolatini e Volgari", 29 (1982-1983), pp. 17-163.

Codi: 248,017 Autor: Guiraut Riquier Gènere: Vers Número: XXVI

 

Be·m degra de chantar tener

		LO XXVII VERS D'EN GR. RIQUIER, L'AN MCCLXXXXII.
I		Be·m degra de chantar tener,
		quar a chan coven alegriers
		e mi destrenh tant cossiriers,
		que·m fa de totas partz doler,
	5	remembran mon greu temps passat,
		esgardan lo prezent forsat
		e cossiran l'avenidor,
		que per totz ai razon que plor.
II		Per que no·m deu aver sabor
	10	mos chans qu'es ses alegretat;
		mas Dieus m'a tal saber donat,
		que·n chantan retrac ma folhor,
		mo sen, mon gauch, mon desplazer
		e mon dan e mon pro, per ver,
	15	qu'a penas dic ren ben estiers,
		mas trop suy vengutz als derriers.
III		Qu'er non es grazitz lunhs mestiers
		menhs en cort, que de belh saber
		de trobar; qu'auzir e vezer
	20	hi vol hom mais captenhs leugiers
		e critz mesclatz ab dezonor;
		quar tot quan sol donar lauzor
		es al pus del tot oblidat,
		que·l mons es quays totz en barat.
IV	25	Per erguelh e per malvestat
		dels cristïas ditz, luenh d'amor
		e dels mans de nostre Senhor,
		em del sieu sant loc discipat
		ab massa d'autres encombriers;
	30	don par quelh nos es aversiers
		per desadordenat voler
		e per outracuiat poder.
V		Lo greu perilh devem temer
		de dobla mort, qu'es prezentiers:
	35	que·ns sentam Sarrazis sobriers,
		e Dieus que·ns giet a nonchaler.
		Ez entre nos qu'em azirat,
		tost serem del tot aterrat;
		e no·s cossiran la part lor,
	40	segon que·m par, nostre rector.
VI		Selh que crezem en unitat,
		poder, savïeza, bontat,
		done a sas obras lugor
		don sian mundat peccador.
VII	45	Dona, maires de caritat,
		acapta nos per pïetat
		de ton filh, nostre redemptor,
		gracïa, perdon ez amor.