Salverda de Grave, Jean-Jacques. Le troubadour Bertran d'Alamanon. Toulouse: Imprimerie et librarie Édouard Privat, 1902.

Codi: 076,022 Autor: Bertran d'Alamanon Gènere: Sirventes Número: I

 

Un sirventes farai ses alegratge

I	1	Un sirventes farai ses alegratge,
		E chantarai iratz sobre feunia,
		E mandarai, don m’es greu e saluatge,
		Lai al comte proensal, on que sia ;
	5	Que re no ual forsa ses ardimen
		Ni honrat pretz ses gran afortimen,
		Ni pot complir nulh bon comensamen,
		Quan falh lai cor ont aiudar deuria.
II		Ben aia coms qu’es d’afortit coratge,
	10	E coms quan leu de cor no si cambia,
		E pueys gran be quant egal son linhatge
		Mante son pretz, que deshonratz no·n sia
		Ben aia ieu e ma dona eissamen,
		E ben Blacatz, quar en valor enten,
	15	E ben lo coms proensals, quar tan gen
		A defendut so que conquist auia.
III		Mais non pessetz de bruyt ni de barnatge,
		Coms, d’er’enan, quar hom no·us en creiria.
		Sabetz per que ? Qu’a mortal uolpilatge
	20	Vos ten hom so que fezetz l’autre dia,
		Don sui iratz e n’ai lo cor dolen :
		Quar tan laissetz Marcelh’ aunidamen,
		Quar non yssitz trompan o combaten,
		o quar sauals no uis qui·us combatria.
IV	25	Comte sai ieu plazen, de belh estatge,
		Que totz lo mans l’acuzav’ e·l corria,
		Quez a vencut, e restaurat paratge,
		Gaug e solatz e pretz que si perdia.
		E sapchatz be que non o fetz fugen,
	30	Ans o a fag donan e combaten,
		Aissi cum selh que a cor e talen
		De far los faitz que·l reis Richartz fazia.
V		Coms de Tolza, lo destric e·l dampnatge,
		L’anta e·l dan que lo Baus sai prendia,
	35	Auetz baissat per uostre uassalhatge
		E restaurat per uostre galhardia ;
		Quar uos etz coms de ualor e de sen,
		E coms de ioy e coms d’abelhimen,
		E coms honratz sobre tot’autra gen,
	40	E coms de pretz e de caualairia.
VI		Coms de Rodes, ab cor e ab talen
		Deuetz auer proeza e ardimen,
		Quar pretz aura totz temps restauramen
		En uostra cort, quant alhors si perdria.