Stroński, Stanislas. Le troubadour Elias de Barjols. Toulouse: Imprimerie et librairie Édouard Privat, 1906.

Codi: 132,012 Autor: Elias de Barjols Gènere: Descort Número: IV

 

Si·l belha·m tengues per sieu

I	1	Si·l belha·m tengues per sieu,
		ia bes no·m falhira.
		Dirai li o doncs ? Non ieu,
		quar ben so albira.
	5	E feira merce, per Dieu,
		si·m des gaug ses ira,
		mas a lieis es vil e lieu
		quar mos cors sospira.
II		Mas ges tant no·l cal de mi
	10	que·m don alegransa,
		ans sai que per so m’ausi
		quar l’am ses doptansa ;
		e s’aisi·m lonha de si
		e non a membransa,
	15	ben puesc dir que mala vi
		sa guaya semblansa.
III		Belha res coind’e guaya,
		plazens e debonaire,
		per merce·us prec que·us playa
	20	qu’ieu vos am ses cor vaire ;
		no vulhatz qu’ieu dechaia
		ni·m fassatz tan mal traire,
		que per nulh mal quie·n traya
		de vos no·m puesc estraire.
IV	25	Quar tan gent mi saubest traire
		del mieu poder et atraire
		vas vos per qu’ieu dei retraire
		vostre pretz et enantraire.
V		Et o farai,     tan cum viurai,
	30	qu’aissi s’eschai     e si cove ;
		mas en esmai     sui car non sai
		si·us auzarai      clamar merce.
		A ! cum serai     rics, quan veirai
		vostre gen cors qu’am mais de re ;
	35	mas pero sai      suy e serai
		vostres, si·us platz, membre·us de me.
VI		La valens reina mante,
		Elihonors, pretz e·l reve,
		que·l genser et ab mays de be
	40	es del mon e·l mielhs se capte ;
		et es mal crezens qui no cre
		qu’ilh no sia·l genser c’om ve.