Stroński, Stanislas. Le troubadour Elias de Barjols. Toulouse: Imprimerie et librairie Édouard Privat, 1906.

Codi: 132,001 Autor: Elias de Barjols Gènere: Canso Número: VII

 

Amors, ben m'avetz tengut

I	1	Amors, ben m’avetz tengut
		en vostre poder loniamen,
		qu’eu anc no·i trobei chauzimen
		ni merces no m’a valgut
	5	ab vos, per que fatz fallensa,
		quar a lieis no mostre mos mals
		cuy suy hom litges naturals,
		pos eu no n’aus far parvensa.
II		Et auriatz m’ ereubut,
	10	amors, e fag ric e manen,
		si·m donavatz tan d’ardimen
		que mon fin cor esperdut
		per sobras de benvolensa
		li mostres una vetz savals ;
	15	ia pueys no·us quezera ren als,
		si·m fessetz d’aitan valensa.
III		Qu’ieu fatz semblansa de mut,
		quan vei son bel cors avinen
		de la bella en cui m’enten ;
	20	si·l tenc mon cor escondut
		qu’ieu no l’aus dir per temensa
		co·l sui francs e fis e leials
		et amicx en totz locs cabals,
		que d’als non ai sovinensa.
IV	25	Ges no·m son dessovengut
		dona·l vostre plazer plazen
		qu’ieu conuc al comensamen
		don m’avetz viu deceubut.
		Car comprey ma conoyssensa
	30	e vostra beutat qu’es aitals
		com belha roz’ e belhs cristals,
		pos ab vos non truep guirensa !
V		Dona, si Dieus vos aiut,
		pos so conoissetz que·us es gen,
	35	conoscatz quo·us am finamen
		ni com mi tenetz vencut
		ni com trac greu penedensa
		ni com suy vostr’ amicx corals
		ni com anc ves vos no fuy fals
	40	ni com vostr’ onors m’agensa.
VI		Al senhoriu de Proensa
		es vengutz senher naturals
		a cuy no platz enjans ni mals
		ni cobeytatz no l’agensa
VII	45	En Blacatz, vostra valensa
		es de totas valors eguals,
		e sapchatz : s’ades etz aitals
		non trobaretz qui ia·us vensa.