Stroński, Stanislas. Le troubadour Elias de Barjols. Toulouse: Imprimerie et librairie Édouard Privat, 1906.

Codi: 132,007 Autor: Elias de Barjols Gènere: Canso Número: VIII

 

Car compri vostras beutatz

I	1	Car compri vostras beutatz
		e vostras plazens faissos,
		don’, e·l belh semblan amoros
		e·l vostr’ avinen solatz,
	5	pos no·us aus mon talan dire
		ni de vos no·m puesc partir
		ni d’als no son mey dezir
		ni nulh ioi tan no dezire.
II		A tart serai deziratz,
	10	avinens dompna, per vos, —
		tant etz aut et ieu suy tan ios, —
		si no·us vens humilitatz
		vostre gen cors don sospire
		qu’ieu n’ai fag maynt greu sospir
	15	e say que non puesc guerir,
		s’umelitatz n’es a dire.
III		Anc no·us dis, — ben acordatz
		dona, — tan suy temeros, —
		con e·us am e·n suy enveios ;
	20	tant no fui de vos privatz ;
		pero, be·m pens e·m cossire
		que tot sabetz mon albir
		ves so que·m fai esiauzir,
		qu’ieu no suy del plus iauzire.
IV	25	Ben suy iauzens e iratz
		del vostre gen cors ioios :
		iratz suy car eu a rescos
		no·us aus dir mas volontatz
		e suy iauzens quan remire
	30	vos qu’est la genser que·s mir
		.    .    .    .    .    .    .    .    .    .
		.    .    .    .    .    .    .    .    .    .
V		Ben es mortz qui apensatz
		viu ni dezaventuros
	35	d’aisso don plus es cobeitos,
		quant no·l n’es nulhs bes iutiaz ;
		d’aital mort suy ieu soffrire
		per vos don no·m tuelh ni·m vir,
		e si·m metetz en azir,
	40	totz lo mons cre que m’azire.
VI		Comtessa, nulh mal cossire
		non es, hom de vos cossir,
		anz tenetz cort de servir
		e de solatz e de rire.
VII	45	D’En Blacatz no·m tuelh ni·m vire
		ni de son pretz enantir,
		que tan no·n puesc de ben dir
		qu’ades mays no·y truep a dire.