Stroński, Stanislas. Le troubadour Elias de Barjols. Toulouse: Imprimerie et librairie Édouard Privat, 1906.

Codi: 132,011 Autor: Elias de Barjols Gènere: Canso Número: X

 

Pus vey que nulh pro no·m te

I	1	Pus vey que nulh pro no·m te
		Amors, ni nul be no·m fai,
		no fas nul esfors si·m n’estrai ;
		pero, forsatz m’en recre,
	5	quar non puesc tan lonjamen
		sufrir tan grieu malanansa
		e quar non ai esperansa
		en calque revenimen.
II		Nulh’ esperansa de be
	10	ni nulh bon conort no sai
		en amor, quar los sieus dechai
		e·ls fals enans’ e mante,
		qu’il n’an tot lo iauzimen ;
		pero, qui·ls sieus dezenansa,
	15	el dezenans pren mermansa
		part lo blasme qui·l n’aten.
III		Ben fui sieus per bona fe,
		mas pus tan mal m’en estai,
		d’amor, que negun ben no·n ai,
	20	pes quascus hueymais de se,
		qu’ie·n part mon entendemen
		e mon cor e m’esperansa,
		forsatz, pos re no m’enansa
		ni no·y truep nulh chauzimen.
IV	25	Anc iorn no·y trobey merce,
		en amor, ni·l plac ni·l plai,
		per qu’eu ia merce no·lh querrai
		quar pes que no·m valgues re ;
		qu’ap senhor avar, tenen
	30	ai estat ses alegransa,
		qu’anc ren mas ir’ e pezansa
		no·n ayc ab greu pessamen.
V		E pus enaissi·s capte
		amors vas los sieus que·ls tray,
	35	be suy folhs s’ieu pus m’i atray ;
		que negus bes no m’en ve,
		si fai d’aitan solamen,
		que·l bell’ en cui ai fiansa
		de que·m don gran benanansa
	40	de son bon pretz no deissen.
VI		Savoia e·l tenemen
		sal Dieus, car nos creis d’onransa
		que flors n’ieis de tal senblansa
		don esperam frug valen.
VII	45	N’Isnart, donan e meten
		creissetz de terr’ e d’onransa,
		En Blacatz no·s dezenansa,
		qu’ades lo truep plus valen.