Longobardi, Monica. I vers del trovatore Guiraut Riquier. "Studi Mediolatini e Volgari", 29 (1982-1983), pp. 17-163.

Codi: 248,072 Autor: Guiraut Riquier Gènere: Vers Número: XXI

 

Res no·m val mos trobars

		LO XXII VERS D'EN GR. RIQUIER, ENCADENAT E RETROGRADAT DE MOTZ E DE SON, FACH EN L'AN MCCLXXXVII EN JANOYER; E CANTA SE AISSI QUON LA COBLA PRIMEIRA LA TERSA E LA QUINTA EZ AISSI CON LA SEGUNDA LA QUARTA.
I		Res no·m val mos trobars,
		mos sabers ni mos sens
		per penre honramens
		en cortz, don m'es amars
	5	lurs segres, tan amara
		vida·n trac; quar no·y platz
		lunhs faitz adordenatz;
		per que·y volgra fugir,
		si me·n pogues sufrir.
II	10	Mout m'es greu per sufrir
		qu'a dever vey fugir
		alcus adordenatz,
		tant lur es totz mals platz,
		qu'us no·m par que am ara
	15	Dieu, on es vers amars;
		don par que·ns n'onra mens,
		quar part M. de tans cens
		es ab mal lurs trobars.
III		Trobar pot, cuy pezars
	20	d'un e d'als es plazens,
		mais de defaillimens
		el mon que bos afars,
		tant vey que tortz s'afara
		e dreitz es esserratz,
	25	quar savis es clamatz
		qui sap aver culhir,
		ab que dreg no y albir.
III		Ben a perdut l'albir
		qui vol desaculhir
	30	Dieu, que·ns a reclamatz,
		ubren camis serratz,
		quar en tot quant a far ha,
		vol de mal ai' afars,
		deziran falhimens;
	35	don luecx mot desplazens
		l'er datz, ab totz pezars.
IV		De doloiros pezars,
		de gaugz dous e plazens,
		sera dels falhimens
	40	vils e dels bos afars
		rendutz meritz, qu'a far ha
		Dieus jutjamens serratz,
		los bos al gaug clamatz,
		los mals a reculhir
	45	al dol, ses tot albir.
V		En la greu mort amara
		del bon rey, es serratz
		pretz, qu'en est mon no platz,
		n'Anfos, qu'elh saup culhir
	50	bos faitz e·ls mais fugir.
VI		No sai vas on m'albir
		per menhs d'afan sufrir.