Stroński, Stanislas. Le troubadour Elias de Barjols. Toulouse: Imprimerie et librairie Édouard Privat, 1906.

Codi: 132,008 Autor: Elias de Barjols Gènere: Canso Número: XIV

 

Mas comiat ai de far chanso

I	1	Mas comiat ai de far chanso
		de midons cuy am e dezir
		a lieys o deuri’om grazir,
		s’ieu ia fas bos motz ni guai so ;
	5	oc !, e s’ieu ren de ben fazia,
		grazit fos a ma douss’ amia,
		car de lieys tenc un pauc de ioi qu’ieu ai ;
		pero, si·l platz, encaras n’aurai mai.
II		Bona dompna, mas vostr’om so,
	10	qu’autr’ e no·us no·m pot guerentir,
		laissaretz mi del tot murir
		d’aisso don mi podetz par do ;
		si o faitz, faretz vilania,
		e parra us rams de feunia,
	15	qui son franc home leyal murir fai
		de dezirier ni·l pot gitar d’esmai.
III		Amia, si Dieus mi perdo,
		trop vos am mais qu’ieu no sai dir,
		qu’ie·n pert lo solatz e·l durmir
	20	e·l ris, ni als no mi sab bo ;
		mas tan que tornatz suy en via
		de chantar, dont ieu me partria,
		qu’ieu chant aras d’aisso non mil vetz ai
		plorat ; — be·s tanh, mas a ma dona plai.
IV	25	Anc hom mais tan forsatz no fo
		d’amor, e no m’en puesc partir ;
		e, si·m faitz finament languir,
		mais vueilh en vostra sospeiso
		estar que si d’autra iauzia :
	30	iauzir non es, car no·m poiria
		autra dompna tener iauzent ni guai
		ni totz lo monz, dompna, de vos en lai.
V		No sai far mon at ni mon pro
		vas nulha part ; tant no m’albir,
	35	e ia no·y vuelh esdevenir
		s’ieu no·us bays la boc’ e·l mento,
		de vos, cuy am senes bauzia,
		e no crey mays tals amors sia
		que mal grat vostre·us am e·us amarai
	40	e mal grat mieu, mas amors m’o atrai.
VI		En vostra bona merce sia
		[e totz mos sens e ma paria]
		qu’ieu no·m recre, dona, ni·m recreyrai
		de vos amar ni nulh poder no·n ai.
VII	45	Chanzos, vai t’en e ten ta via,
		a la bella·m di senz bauzia
		qu’autra dompna no voil ni qier ni ai
		ni vos non ai ni sai si ia·us aurai.