Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Estudi introductori
* Bibliografia de l'edició

* Davantal
* Bibliografia
* Testimonis
* Aparat crític
* Notes
* Traduccions
* Imatges

 

Schutz, Alexander H. Poésies de Daude de Pradas. Toulouse - Paris: Édouard Privat - Henri Didier, 1933.

Codi: 124,006 Autor: Daude de Pradas Gènere: Canso Número: III

 

Ben ay' Amors, quar anc me fes chauzir

I
1
Ben ay’ Amors, quar anc me fes chauzir
   
lieys que no·m vol ni·m denha ni m’acuelh ;
   
quar si·m volgues aissi cum ieu la vuelh,
   
non agra pueys de que·m pogues servir :
 
5
precx e merces, chauzimens e paors,
   
chans e dompneys, sospirs, dezirs e plors
   
foran perdut, si fos acostumat
    que engalmen fosson aman amat.
     
II
 
Us joves cors complitz de gran beutat,
 
10
guais, amoros, cortes, de bon agrat,
   
on es fis pretz renovelhatz e sors,
   
m’a si conquis non puesc pensar alhors ;
   
q’ieu non vau tan vas autra part ni·m vir,
   
qu’ades mon cor no tir lai e mey huelh ;
 
15
e s’ieu aisso li vet nulh temps ni·l tuelh,
    ja fin’ Amors no m’en fassa jauzir.
     
III
 
Gaugz e plazers m’en ven on plus mi duelh,
   
e suy pagatz, tan m’es bon a suffrir ;
   
quar molt vuelh mays per lieys cui am languir,
 
20
qu’autra·m don so don ill me fai erguelh ;
   
qu’ieu no vuelh ges aver quist ni trobat
   
dona que m’aya trop leu joi donat ;
   
quar non es joys si non l’aduy honors,
    ni es honors si non l’aduy Amors.
     
IV
25
S’Amors o vol, e·m fai Merces secors,
   
ieu serai tost gueritz de mas dolors
   
e dels maltragz on ai lonc temps estat ;
   
mas si·m destrenh Razos, e·m fier e·m bat
   
que tot quan pes me torna d’autre fuelh,
 
30
per folh mi tenh quar ja vuelh ni dezir
   
so que no·s pot ni no·s deu avenir ;
    e non per tan q’ieu remaing tals cum suelh.
     
V
 
Ges de midons no·m pot Razos partir,
   
qu’ieu clam per Dieu e per humilitat ;
 
35
e si Razos trai, de lai, sas ricors,
   
ieu fatz, de sai, de Merce mon capduelh ;
   
e ges no pert son pretz fina lauzors,
   
si chauzimens li daura son escuelh,
   
que·l dieus d’amor a ben per dreit jutjat
 
40
que dona deu son amic enriquir.
     
VI
 
D’esser clamans me devet e·m destuelh,
   
ans grazirai si·m denha neys auzir
   
Amors, que·m es capduelhs e guitz e tors,
   
e·m pays tot jorn de pessamen onrat.
 
45
De Joy Novelh me tenc be per paguat,
   
no l’enguana de re lo miradors.
   
Totz temps la vuelh onrar e obezir
    e car tener, e qui·s vol s’en janguelh.
     
VII
 
Lai on son tug li valen ajustat
 
50
t’en vai, chansos, ves Anduza, de cors ;
   
e si·t vols far en bona cort grazir,
    crida soven : « Caslutz e Rocafuelh ».

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI