Johnston, Ronald C. Les poésies lyriques du troubadour Arnaut de Mareuil. Paris: Droz, 1935.

Codi: 030,003 Autor: Arnaut de Maruelh Gènere: Canso Número: IX

 

Aissi cum cel c'am' e non es amaz

I	1	Aissi cum cel c'am' e non es amaz
		o hai eu fach, c'ai amat longamen
		en un sol luoc, e ges no m'en repen,
		anz la voill mais amar desesperaz,
	5	que d'autr' aver totas mas voluntatz ;
		e car eu l'am finamen, ses engan,
		cre qu'il val tan per que no·i haurai dan.
II		Auzit ai dir, per que·m soi conortaz,
		que qui ben serf bo guierdo aten,
	10	ab que·l servirs sia en luoc valen,
		qu'enaissi es mot meilz guierdonaz ;
		per qu'eu me soi del tot a vos donaz,
		bona dona, que d'al non ai talan
		mas de servir vostre cors benestan.
III	15	Meills que no·us dic, vos prec que m'entendaz,
		que mais vos am qu'eu non aus far parven,
		e non m'en lais mais per drech espaven ;
		qu'eu me feira mot de vos plus privaz,
		mas diri' hom qu'eu fos enamoratz ;
	20	pero vers es c'anc re non amei tan,
		mas endrech vos non aus far lo semblan.
IV		Vos valez tan, ben cre que sapïaz
		que miells ama cel que prega temen ;
		e cals que prec' ades ardidamen,
	25	bela dona, ja aqel non cresatz,
		c'ab enjan va (e sia enganaz !),
		mas eu soi cel que temen muor aman,
		per que no·us aus preiar mas en chantan.
V		Soven m'aven, la nuoch can soi colgaz,
	30	que soi ab vos per semblan en dormen ;
		adonc estau en tan ric jausimen,
		ja non volri' esser mais residaz,
		sol que·m dures aquel plazenz pensatz ;
		e can m'esveill, cuich murir desiran,
	35	per qu'eu volgra aissi dormir un an.
VI		Bela dona, soven soi acordaz
		qu'ie·us an vezer, e soven vau doptan
		que no·us plagues ; per qu'eu n'ai estat tan.
VII		Seigner Frances, cals que sia baussaz,
	40	de toz bos prez vos anaz meilloran,
		per dir e far trestot faich benestan.