Johnston, Ronald C. Les poésies lyriques du troubadour Arnaut de Mareuil. Paris: Droz, 1935.

Codi: 030,004 Autor: Arnaut de Maruelh Gènere: Canso Número: X

 

Aissi cum cel que anc non ac cossire

I	1	Aissi cum cel que anc non ac cossire
		ni voluntat ni cor ni pessamen,
		de nuilla ren, pois vos vi, mas de vos,
		ai ieu estat, dompna, tant cossiros
	5	cum pogues tant de plazers far e dire
		que, una vetz en trastot mon viven,
		vos fos d'aco qu'ieu plus desir servire.
II		E doncs, dompna gensser qu'el mon se mire,
		pois aissi sui vostre ses ligamen
	10	per chausimen e per honor de vos,
		voillatz, si·us platz, que·l vostre bels respos
		tenga·l mieu cor plazen en tal albire
		que·il voluntatz qu'ai del vostre cors gen
		no l'estrangan ni l'angoisos martire.
III	15	Vas calque part ieu an ni·m volv ni·m vire,
		bona dompna, tant vos am finamen,
		mos coratges no·is pot partir de vos ;
		anz en durmen me vir maintas sazos,
		qu'eu joc e ri ab vos e·n sui jauzire ;
	20	pois, quan ressit, vei e conosc e sen
		que res non es, torn en plor e m'azire.
IV		Pero plazens e dolz e ses martire
		mi sembla·l mals, per lo ben qu'ieu n'aten ;
		e si'us plagues qu'ieu agues ren de vos,
	25	anz c'om saubes per me que res en fos,
		sapchatz, dompna, que·m laissera aucire.
		Ja Dieus no·m don pois viure longamen,
		quan dirai ren don vostre cors s'azire.
V		Mais voill estar totz temps cum francs sufrire,
	30	quan plus non puosc aver de jauzimen,
		c'aia·l solatz e l'acuillir de vos,
		c'anes preian sai e lai a rescos,
		que ges no·n puosc mon coratge devire,
		c'al mieu albir, qui en dos luocs s'enten
	35	a chascun es enganaire e mentire.
VI		De las domnas, no s'eschai ges a dire,
		que mainh n'i a que·s camjon tan soven,
		que dans hi a selh qu'es ses mal cossire.
VII		Dona, lo jorn m'aucietz mantenen
	40	que ja·m trobetz en re mas em ben dire.