Johnston, Ronald C. Les poésies lyriques du troubadour Arnaut de Mareuil. Paris: Droz, 1935.

Codi: 030,009 Autor: Arnaut de Maruelh Gènere: Canso Número: XVI

 

Belhs m'es lo dous temps amoros

I	1	Belhs m'es lo dous temps amoros,
		lanquan lo mons reverdezis,
		per qu'ieu m'alegr' e m'esbaudis
		ab joy de las novellas flors
	5	e chant d'amor jausens pel bon esper ;
		qu'aissi m'estai mos cors mati e ser
		que d'als no·m ve pessamens e cossires.
II		En tal domna, qu'es belh' e pros,
		ai mon entendemen assis,
	10	e sos pretz es tam bos e fis
		qu'en sa beutat gensa valors :
		aisso la·m fai plus duptar e temer ;
		et on mielhs vey que no·m deu eschazer,
		m'en creys magers voluntatz e dezires.
III	15	Ges no puesc esser oblidos,
		qu'el mon ren tant no m'abelis ;
		be·m malmenet e be m'aucis ;
		quar anc la·m fes amar Amors ?
		Si·m son li mal abaissat a plazer
	20	que totz jorns muer, pus no m'en vol mover,
		ans m'es sojorns lo solas e·l martires.
IV		E pero, si be·l mals m'es bos,
		grans ops m'auria qu'en gueris,
		e s'ilh, ves cuy ieu sui aclis,
	25	fezes m'ajuda e secors,
		Amor, faras ja ren al mieu voler ?
		per so t'en prec, tu qu'o as em poder,
		qu'un pauc ves mi lo sieu coratge vires.
V		E s'ieu auzes dir : « Quar mi fos
	30	una nug lai on desvestis,
		sol que·l plagues qu'ieu li servis, »
		qu'aisso seria grans honors ;
		e s'a prezent, per proar de saber,
		non l'auzava adoncx solatz tener,
	35	mans joys es ja que valon mais que rires.
VI		Contra·ls lauzengiers enveyos,
		mal parlans, per qui jois delis,
		volgra que celes e cobris
		son cor quasqus dels amadors,
	40	que tals es fals, lo segles a tener,
		e ges ades non deu hom dire ver,
		soven val mais mentirs et escondires.
VII		Lo vers tramet a midons per plazer ;
		mal o fas, cors, c'aissi·t potz abstener,
	45	quant aus parlar de lieis, que non sospires.