Johnston, Ronald C. Les poésies lyriques du troubadour Arnaut de Mareuil. Paris: Droz, 1935.

Codi: 030,001 Autor: Arnaut de Maruelh Gènere: Canso Número: XXI

 

A gran honor viu cui jois es cobitz

I	1	A gran honor viu cui jois es cobitz,
		que d'aqui mou cortesi' e solatz,
		enseignamenz e franques' e mesura,
		e cors d'amar et esfortz de servir,
	5	e chausimenz, sabers e conoisensa,
		e gens parlars et avinens respos,
		e tuich bon aip, per qu'om es gais e pros.
II		Tostemps er jois per mi coutz e servitz,
		de mon poder car tengutz et amatz.
	10	M'esperansa ai mes e ma ventura,
		mas car tant tart vei lei qu'eu plus desir,
		n'ai e mon cor vergonia e temensa ;
		no m'en rason, car no m'en val rasos,
		mas chausimenz e merces e perdos.
III	15	Bona domna, cui jois e pretz es guitz,
		esgart mon cor la vostr' umilitatz,
		e si trobatz e mi nulla falsura,
		ja·l vostre cors (no·us en puosc plus carsir)
		no·m fassa pois de nuill joi mantenensa,
	20	que·l do que·m detz, domn' ab digz amoros,
		me creis el cor, per qu'eu sui d'engan blos.
IV		Vas on qu'eu an, la cors e l'esperitz
		s'es al vostre seignoriu autreiatz,
		e, s'a vos platz, no·m gitetz a noncura,
	25	que sol d'aitan me podetz enrequir,
		sufretz qu'ie·us am, e, si tot no·us agensa,
		non puosc esser de mon cor poderos
		que mais no·us am que me ni ren qu'anc fos.
V		Car vos enquier, ben i fatz que arditz,
	30	mas a totz jors dobla ma voluntatz
		de ben amar et esmer' e meillura.
		L'engien c'Amors vol als autres partir
		lor va tolen, car i conois faillensa,
		e dona·l mi, car sui fis, francs e bas,
	35	qu'estiers, domna, non auser' amar vos.
VI		Mas Gens Conquis, Deus vos det conoissensa
		e totz bos aips, per qu'es tant enveios
		e fis e cars vastres pretz sobre·ls bos.
VII		En Aragon al rei cui jais agensa,
	40	tramet mon chan, car es cortes e pros,
		e lai o·is tanh humils et orgolhos.