Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Estudi introductori
* Bibliografia de l'edició
* Glossari

* Davantal
* Bibliografia
* Testimonis
* Aparat crític
* Notes
* Traduccions
* Imatges

 

Johnston, Ronald C. Les poésies lyriques du troubadour Arnaut de Mareuil. Paris: Droz, 1935.

Codi: 030,023 Autor: Arnaut de Maruelh Gènere: Canso Número: XXIII

 

Si·m destreignetz, dompna, vos et Amors

I
1
Si·m destreignetz, dompna, vos et Amors,
   
c'amar no·us aus ni no m'en puosc estraire :
   
l'us m'encaussa, l'autre·m fai remaner,
   
l'us m'enardis e l'autre·m fai temer,
 
5
preiar no·us aus per enten de jauzir ;
   
mas, si cum cel qu'es nafratz per morir,
   
sap que mortz es e pero si·s combat,
    vos clam merce ab cor desesperat.
     
II
 
Bona dompna, paratages e ricors,
 
10
on plus aut es e de maior afaire,
   
deu mais en si d'umilitat aver,
   
car ab orguoill non pot bos pretz caber,
   
qui gen no·l sap ab chausimen cobrir.
   
E pois no·m puosc de vos amar sofrir,
 
15
per merce·us prec e per humilitat,
    c'ab vos trobes calacom pietat.
     
III
 
No mi nogues vostra rica valors,
   
c'anc no la puoc un jorn plus enan traire,
   
pos qu'ieu vos vi aic lo sen e·l saber
 
20
e·l vostre pretz creisser a mon poder ;
   
qu'en mains bos luocs l'ai dich e faich auzir.
   
E si·us plagues c'o deignassetz grazir,
   
no·us quezira plus de vostr' amistat
    e gauzira per guizerdon lo grat.
     
IV
25
Totz los forfaitz e totas las clamors
   
que·us mi podetz rancurar ni retraire,
   
es car m'ausatz abellir ni plazer
   
mas d'autra ren qu'ieu anc pogues vezer ;
   
autr' ochaison, dompna, no·m sabetz dir
 
30
mas car vos sai conoisser e chausir
   
per la meillor et ab mais de beutat :
    ve·us tot lo tort en que m'avetz trobat.
     
V
 
Vostre beill huoill, vostra fresca colors
   
e·il doutz semblan plazen que·m sabetz faire
 
35
vos mi fan tant desirar e voler
   
que mais vos am, on plus m'en desesper,
   
e fatz que fols car no m'en sai partir.
   
Mas quand ieu pens cals etz que·m faitz languir,
   
cossir l'onor et oblit la foudat,
 
40
e fuich mon sen e sec ma voluntat.
     
VI
 
Belhs Carboncles, no·us cal pus de ben dir,
   
ni qui·l Marques mentau de Monferrat,
    ja plus no·l laus, qu'assatz l'aura lauzat.

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI