Mouzat, Jean. Le Troubadour Arnaut de Tintinhac: édition critique des poèmes précedée d'une introduction. S.L.: S. N., ca. 1957.

Codi: 411,002 Autor: Arnaut de Tintinhac Gènere: Canso Número: IV

 

Bel m'es quan l'erba reverdis

I	1	Bel m’es quan l’erba reverdis
		e·l vergier son vestit de flors,
		e la fontaina s’esclarzis,
		e·l ram son vermeil de colors —
	5	Adonx m’es pres novels talans
		qu’eu si’ amoros e prezans,
		l’estiu e l’ivern atressi,
II		tan soi en ves ma dona fis
		— que fina l’atrobei, senhors ! —
	10	mas ara faill si·m brunezis,
		per qu’ieu m’en vau mudan aillors ;
		e soi me partitz dels enjans
		per autr’ amor, cui soi comans ;
		per cui totz mos cors chant e ri.
III	15	Aquest amors m’alegrezis
		e·m dona joi e·m tol dolors,
		e·m reviu e·m rejovenis
		e·m recomta maintas valors ;
		sesta m’es conortz et enans,
	20	e·m restaura perdas e dans,
		quan ieu la vei, et ella mi.
IV		Enans fui sieus, qu'ieu anc la vis
		e·ill portei en mon cor honors ;
		mas, quan la vey, totz m'esbaïs,
	25	que·l joi m’en tol pura paors ;
		e remanh en aital doptans,
		quar no·ill puesc esser gen parlans
		d'aco qu'ieu pes ni·l cors me di.
V		Al comjat, pensei s'en pentis,
	30	quar mos digz non a faitz gensors
		mas, quar non puesc, m'en penedis ;
		e prenc lo pas e lais lo cors,
		e vau com fola res pensans,
		las vias e·ls cams traversans,
	35	de sai en lai, tot enaissi.
VI		Que·m val, pos ella no·m grazis,
		digz o faitz o sens o folors ?
		o cal que re no me servis,
		per qu'ieu no fos en tals errors !
	40	Lonc temps n'ai estat fadians
		e serai, s'ila·s vol, truans,
		qu'en la soa merce m'en fi.
VII		El plazer midons me sui mis
		per so quar en lieis es m'amors ;
	45	e, pos ella m'a tot conquis,
		be·m degra far semblans meillors,
		que·l pretz de lieis es ricx e grans ;
		hom no·n sia meravillans,
		s'ieu soi totz sieus lai et aissi !
VIII	50	Pus sos pretz es ricx e montans,
		hom no·n sia meravellans
		s'ieu suy totz sieus lay o aissi !