Cots, Montserrat. Las poesías del trovador Guillem de Cabestany. "Boletín de la Real Academia de Buenas Letras de Barcelona", 40 (1985-1986), pp. 227-330.

Cots, M., "Notas históricas sobre el trovador Guillem de Cabestany" > CdT: Observacions

Codi: 213,008 Autor: Guillem de Cabestaing Gènere: Canso Número: VIII

 

Egan, res qu'ieu vis

I		Egan, res qu'ieu vis
		no·m det alegrier,
		ni·m plac flors de lis
		ni fruz d'aiglentier;
	5	ans vau mieg ausis
		de mieg desirier
		e de benvolenza,
		qu'e mala merce
		m'a tengut Amors,
	10	don mi ven l'esmais
		e la greus dolors.
II		Be m'a tot aquis
		per son domengier
		Amors, qu'ie·l so fis
	15	et aman sobrier,
		et estau aclis
		al pejor guerrier,
		qu'ieu ai gran faillenza
		fait, car no·l sove
	20	dels amoros plors,
		q'era m'es esglais
		zo qe·m fon douzors.
III		S'els huils abelis
		Amors de primier,
	25	mas li plor el vis
		e·l douz cossirier
		son al cor assis.
		D'envejos mestier
		no·m par malsabenssa,
	30	qu'ieu am mais de re
		leis don fatz clamors
		e, can non pusc mais,
		dic ne deslausors.
IV		Tant jorn ai enqis,
	35	per talan leugier,
		q'ieu de leis auzis
		blasm'o reproier,
		mas cil del pais
		son gen vertadier
	40	de sa captenenza,
		qe so q'il fa be
		l'es grazit e sors,
		et no l'es re frais
		c'a leis si'honors.
V	45	D'aitan m'obezis,
		si mais non sofier,
		volgues que·l servis;
		e, si trop li qier
		lo seu gent cors lis
	50	d'un joi plasentier
		humil, sa valenza
		l'adouzis vas me
		l'orguill; que sabors
		m'es que tot joi lais
	55	ans que·m vir aillors.