Sakari, Aimo. Poésies du troubadour Guillem de Saint-Didier. Helsinki: Société Néophilologique, 1956.

Codi: 234,007 Autor: Guilhem de Saint Leidier Gènere: Canso Número: VI

 

Dompna, ieu vos sui messatgiers

I	1	Dompna, ieu vos sui messatgiers,
		Et el vers entendetz de cui,
		E salut vos de part cellui
		Cui vostre jois alegr' e pais.
	5	E sapchatz ben: des er’ oimais
		Vostre messatges vertadiers
		Serai del vers, qu·i qe·l vos chan:
II		»De totz los autres cavalliers
		Vos deffen l'amor mas de lui,
	10	Q'el es de ric pretz ed astrui
		E sa proeza creis e nais;
		E si amar devetz ja mais,
		Lui prec que ametz voluntiers
		Q'el non a per c'om lo soan.
III	15	Tant es en vos sos cossiriers
		Que tot autre joi en defui,
		Et autre volers no·i l'adui
		Ma·l desirs qe·l ten en pantais.
		Desirant, cre, morir se lais
	20	Q'el trai pieitz c'altre carceriers
		Q'el non muor, ans languis cuidan.
IV		L'amors qe·l venz e·l deziriers
		L'ant si destreich que ses autrui
		Parl' atresi cum s'eron dui,
	25	C'a si mezeis ditz quan s'irais:
		»Ai! cors, per que m'aucis ni·m trais?
		Que fals faras e que leugiers
		Si ·naissi m'aucis desiran.»
V		Ja pelz enojos lausengiers
	30	Per cui Jovens baiss' e destrui
		No·il toillatz lo joi ni·l condui
		Ni·l bon esper don el si tais,
		E pos anc no·is rompet ni·s frais
		Vostre pretz qu'es a totz sobriers
	35	Non comensetz en lui engan.
VI		Q'engans es e cors volatgiers
		E blasmes don totz lo monz brui
		D'amic qan si feing ni s'esdui
		Vas cellui qe l'es fis verais;
	40	Qu'anc no·us fetz fencha ni escays
		Anz es humils e plazentiers
		Vas totz, c'uns no l'en tenga dan.
VII		Sabetz quals es lo reprochiers:
		»Qui sobre l'aur estaing endui
	45	L'amor e·l sojorn escondui»,
		E, si res li torn' en biais
		Et apro lo ben ven l'esmais,
		Lo rics jois qu'es vengutz premiers
		Sobrevenz l'ir' e vai falsan.»
VIII	50	Non sai cals s'es lo cavalliers,
		Mas s'ie·us en prec (non vos enui)
		De l'ira qu'aviatz ab lui
		Que per m'amor no·n si' oimais,
		Anz prec q'en sia fis e pais;
	55	Tant sui vostre bons conseilliers,
		Non i doptetz, q'ie·us o coman.
IX		Bos vers, s'ab Merce la·m conquiers
		Mieils serai sieus qu'anc mais no fui,
		Q'en aitant cum soleils relui
	60	Es la mieiller qu'el mon s'apais
		E·l genser e sil que val mais,
		Per q'ieu remir plus voluntiers
		Son paÿs que totz mi resplan.
X		Per sol lo bon pensier engrais
	65	E·l volers es tant sobranciers
		Que tot' autr' amor nore blan.