Sakari, Aimo. Poésies du troubadour Guillem de Saint-Didier. Helsinki: Société Néophilologique, 1956.

Codi: 234,015 Autor: Guilhem de Saint Leidier Gènere: Canso Número: XII

 

Per Dieu, Amor, en gentil luoc cortes

I	1	Per Dieu, Amor, en gentil luoc cortes
		Saupest assire tot mon cor e mon sen,
		Per qu'ie·us o dei mais grazir lonjamen
		Que non cugera m'esdevenir pogues
	5	Que la gensor m'aves fait abellir
		Que si' el mon en fait et en semblan:
		Tant es bella qu'ieu hi conosc mon dan,
		C'ab sol l'enveya cre que·m n'er a murir.
II		Ben sai del mon que, s'a chauzir agues,
	10	Qu'en leis chauzira, si·s feran d'autres cen,
		Per qu'ieu am mais de leis lo lonc aten
		Que de nuil' autra ren que far mi pogues.
		Mais trop ai mes autamen mon dezir,
		Per c'ai paor qu'ela·m torn en soan;
	15	Car ges non puesc capdelar mon talan
		C'ades non vuelha lo miels qu'el mont se mir.
III		Ric joy e car e volgut e defes —
		C’ab Cortezia monta son pretz valen —
		A·i ben trobat qui que l'anes queren
	20	Ho qui que l'aia; per mi non o dic ges,
		Qu'ieu non l'aurai ni no·m deu avenir.
		Pero be sai que, si Dieus m'ames tan
		Que de s'amor agues o tant o can,
		Sol que ren n'aia, sia·s el seu chausir.
IV	25	Qui·n ric' amor met son cor e son pes,
		Si tot li tarza, ric guizardo n'aten.
		Qui ric seinhor pot servir lonjamen,
		Si tot bistensa, pueissas l'en pren merces.
		Que mais li pot en sol un jorn servir
	30	E far honor que cen paubr' en un an,
		Per qu'ieu n'aten l’onor e·l joi tan gran,
		Qu'en ric parage ai pauzat mon albir.
V		Preyera la, si sol a leis plagues,
		Que·m consentissa un celat parlamen,
	35	Car s'ieu la vauc vezer tot a prezen,
		Diran mesonjas maint enujos plaides;
		Et enaixi pot ben esdevenir
		Enans del fag, on cascuns a pueis dan;
		E si fossan acordat des aban,
	40	Abdui se pogran ab mens de bruit jausir.
VI		D'una ren fan domnas gran nesies:
		C'ab lonc enquerre fan lur joi conoissen.
		Cant hom las pregu' et elas n'an talen
		Et es vejaire c'an ben lur amor mes,
	45	Per que·n fan plus de paraulas auzir?
		Car asatz son saubut li devinan
		Que·n diran mais granren qu'elas non fan,
		C'ab lur enveya an fait mant joi partir.
VII		Chansoneta, vai·m dir a mon Bertran
	50	Qu·ie·l prec que·t fassa al sieu Bertran auzir.