Sakari, Aimo. Poésies du troubadour Guillem de Saint-Didier. Helsinki: Société Néophilologique, 1956.

Codi: 234,016 Autor: Guilhem de Saint Leidier Gènere: Canso Número: XIII

 

Pois tant mi forss' Amors que m'a faich entremetre

I	1	Pois tant mi forss' Amors que m'a faich entremetre
		C'a la genssor del mon aus ma chansson trametre,
		E pois non auz aillors mon fin cor esdemetre,
		Ben deuri’ enplegar mon sotil sen e metre
	5	Si·l plagues qe·m laisses en son servizi metre
		Cill cui hom liges sui ses dar e ses prometre.
II		Lo prometr' amer' ieu, e fos falsa·l promessa,
		Mais que s'autra del mon m'agues joia tramessa;
		E si neguna s'es de m'amor entremessa,
	10	Entenda·s en autrui, q'ieu sec dreit' esdemessa:
		Mon ferm voler ves tal que, si·m sal sains ni messa,
		Eu no·il aus descobrir qe·i aia m'amor messa.
III		Messa·i ai tant m'amorque no m'en puosc estraire
		Ni nuill' autra del mon no·m pot gran joi atraire,
	15	Estiers que ren no·il dic ni no li aus retraire
		Mas tant q'en mas chanssos dic aital contratraire
		Si qu'il sol' o enten com non pot plus mot traire
		Per paor d'envejos que la·m cujon forstraire.
IV		Fortraich m'a si mon cor non sai vas on m'i teigna:
	20	Ni partir no m'en puosc ni cuich que ja·i ateigna,
		Pero d'aitant la prec, s'a lieis platz, qe·m manteigna:
		No·ill enoi s'en dic ben ni a mal no s'o teigna,
		Et aissi sofrirai tot so que m'en aveigna
		E puais aurai respieich que per Merce·m reteigna.
V	25	Retener non puosc mais lo desir ni esbatre
		C'a totz jorns creis e nais e no·l puosc escombatre;
		Trop m’i fetz en fols plais mon ferm voler desbatre,
		Mas negus hom non pot cor destreigner ni batre.
		Que farai doncs s'ieu l'am e no la puosc abatre:
	30	Languirai desiran c'ab lieis no·m puosc combatre.
VI		Combatre no·l pot hom qe·il gensser e·il mieills faita
		Es que sia el mon e que genseitz afaita
		Tot cant taing a bon pretz, que ren non desafaita;
		Per que sa grans valors non deu esser desfaita,
	35	E s'Amors es en luoc mespresa ni mesfaita
		Sol que la fass' amar es enders' e refaita.
VII		Refaitz for' e reders s'ila·m deignes emprendre
		Un jorn qez ieu la vis e·m fezes desaprendre
		Lo mal q'ieu trac per lieis que nuills non pot aprendre,
	40	Que non i a negun que s'i auses reprendre.
		Mas tant vei son ric pretz per tot lo mon perprendre
		Q'en lieis es lo chausitz cui qe·is vol si pot prendre.
VIII		Amics Bertrans, Bertrans ben fari' a mesprendre:
		Si·l messoigna fos vers aillors feir' ad aprendre.