Radaelli, Anna. Raimon Gaucelm de Béziers. Poesie. Firenze: La Nuova Italia, 1997.

Codi: 401,003 Autor: Raimon Gaucelm de Bezers Gènere: Sirventes Número: IV

 

A penas vau en loc qu’om no·m deman

I	1	A penas vau en loc qu’om no·m deman:
		«Raimon Gaucelm, avetz fag re novelh?»
		Et ieu a totz respon ab bon talan
		quar totas vetz m’es per ver bon e belh,
	5	e·m plai quant aug dir de mi: «Aquest es
		tals que sap far coblas e sirventes!»
		E non per so qu’ieu vuelha qu’om del mon
		m’en don raubas, qu’ieu n’ai pro e sai don.
II		E per so n’ai joi et alegrier gran
	10	quar mant home valen m’en fan sembelh
		de lur amor e m’en venon denan,
		qu’estiers nulh temps non gazanhei castelh,
		borda ni mas, ni·l quart d’un clarmontes,
		ans me costa que val .v. cens tornes!
	15	E no m’o planc quar d’aval e d’amon
		n’aug mais nomnar lo mieu frair’En Ramon.
III		Pero aquelh que dis que trop mal fan
		selhs que donan, men pus que fals mezel[h]:
		quar qui dona, a lauzor on que an
	20	e grat de Dieu, que·l mon ten en capdelh,
		quar ses donar luns hom valens non es.
		Pero mais val lo dos on pus francx es,
		quan Caritatz l’adutz a cor volon
		lai on Merces li fai planca e pon.
IV	25	Mas negus homs no vei, don m’es pezan,
		qu’a sso manjar negun paupre apelh,
		e sai ne moutz que dins lai on estan
		s’acluzon, pus no fa’b son past auzelh!
		E sai prelatz e terriers e borzes
	30	que·s veston quetz quascus de mes en mes,
		que quascus ven sos vestirs a rescon,
		qu’a nulh paupre no vei negus aon.
V		Negus d’aquetz no fan ges lo semblan
		de San Marti, que parti so mantelh
	35	ad un paupre qu’anava tremolan!
		Et es me grieu, quar cre qu’estranh mazelh
		sera d’elhs faitz lai, on la cremor es
		del foc d’ifern. E sai que mal lor es
		quant hom lo vers en chantan lur despon,
	40	pero meinhs pres aquel que mais en gron.
VI		Sirventes vai, drech cami a pales
		al mieu frair’En Ramon Gaucelm, quez es
		savis, et a ferm e fin cor volon
		de far bos fatz aitan quant hom del mon.