Radaelli, Anna. Raimon Gaucelm de Béziers. Poesie. Firenze: La Nuova Italia, 1997.

Codi: 401,008 Autor: Raimon Gaucelm de Bezers Gènere: Chanson de croisade Número: VI

 

Qui vol aver complida amistansa

I	1	Qui vol aver complida amistansa
		de Jhezu Crist, e qui·l volra servire,
		e qui volra lo sieu nom enantire,
		e qui volra venjar la deshonransa
	5	qu’Elh pres per nos quan sus la crotz fo mes,
		passe tost lai on Elh fon trespassans,
		e sïa be de sa mort demandans
		e de l’anta qu’El per nos autres pres.
II		Dieus pres, per nos salvar, greu malanansa,
	10	que·n fon batutz, e·n suffri tal martire
		que sus la crotz en volc penden murire
		ab gran dolor, e·i fo plagatz de lansa.
		Per que·l so fals trastotz, ― quan be m’o pes! ―,
		aquelhs que so del passatge duptans.
	15	Mielhs lai deuram quascus anar enans
		nutz o descaus, qui estiers no pogues!
III		Mas trop d’omes son qu’eras fan semblansa
		que passaran, e ges no·n un dezire.
		Don se sabran del passar escondire
	20	ganren d’aquelhs, e diran ses duptansa:
		«Ieu passera, si·l sout del rei agues»,
		l’autre dira·n: «Ieu no sui benanans»,
		l’autre dira·n: «S’ieu non agues efans,
		tost passera, que sai no·m tengra res».
IV	25	Ve·us quals sera d’aquelhs lur escuzansa.
		Mar s’als no·i fan, Dieus lur sabra ben dire
		al jutjamen, segon lo mieu albire:
		«Anc vos autres non demandetz venjansa
		de la mia mort, per so siatz a mal mes!»
	30	Et als autres, qu’auran suffertz affans
		per la su’amor, dira: «Los mieus amans,
		venetz a mi, que tot m’avetz conques!»
V		Aquels auran tostemps mais alegransa,
		mar los autres auran dol e cossire.
	35	Doncx si·ns volem nos altres far grazire
		a Jhezu Crist, que tot quant es enansa,
		passem tost lai on Elh fon per nos pres,
		cominalmens trastotz, ab bos talans,
		et enaissi serem li agradans.
	40	Doncx passem lai, que temps e razos es!
VI		Qui passara, Dieus, qu’a fag tot quant es,
		li secorra e·lh sïa aiudans,
		e·lh do·l regne don ieu sui esperans,
		e li perdo, e·lh vall’en totas res!
VII	45	Amicx Miquels, digatz me·l sirventes
		a N’Aimeric de Narbon’en chantans,
		e digatz li que non sïa duptans
		que, s’ilh passa, pus tost n’er tor conques.