Bertoni, Giulio. I trovatori d'Italia. Modena: Editore Cav. Umberto Orlandini, 1915.

Codi: 282,005 Autor: Lanfranc Cigala Gènere: Canso Número: XXXIII

 

Escur prim chantar e sotil

I	1	Escur prim chantar e sotil
		Sabria far, si·m volia,
		Mas no·s taing c'om son chant afil
		Ab tan prima maestria
	5	Que no sia clars com dia,
		Que sabers a pauc de valor
		Si clardatz no·ill dona lugor,
		Qu'escur saber tota via
		Ten hom per mort, mas per clardat reviu,
	10	Per qu'ieu chant dar e d'ivern e d'estiu.
II		Tan tost chant d'ivern qan d'abril
		Ab sol que razos i sia,
		E pres mais, qui q'en als s'apil,
		Clars digz ab obra polia
	15	Qu'escurs motz ab serran lia;
		E no·m par q'aia tant d'onor,
		Si tot lo cui'aver maior,
		Cel que son chant serr'e lia,
		Qon cel que·l fai ab clardat agradiu;
	20	Per qu'eu, qan chant, en chantar clar m'abriu.
III		E qi me·n tenia per vil
		Ni m'o contav'a folia.
		Ben sai q'ab qatr'omes de mil
		D'aiso no s'acordaria;
	25	E pos tan granz partz fos mia,
		S'el en prendia desonor
		Poiri'encolpar sa folor;
		Et es ben granz aurania
		Qu'escurs motz fai, qais q'aia sen autiu,
	30	Tals que no sab trair'alga de clar riu.
IV		Autr'avoleza femenil
		Que nais d'envei'ab feunia
		Fan cil q'en blasmar l'autrui fil
		S'aprimon ab vilania;
	35	Mas qui far non o sabria,
		Per que blasma l'autrui labor?
		Aisso tenc eu per grant error,
		E per mon grat non seria,
		Qe ges no mou si non de cor chaitiu;
	40	Per qu'eu cosseil a chascun que·s n'esquiu.
V		Mas eu am domna segnioril
		Gai'e de bela paria,
		Li cui fag son dar e gentil
		Nurit de fin pretz qe·ls guia:
	45	Qu'il vai tant per cortezia,
		Que d'un plazen ris mi socor
		Ades qant me ve per amor;
		E·l bais m'a mes en tal via.
		De qu'ela·m fes per sa merce aisiu,
	50	Qu'eu conquerai l'onrat ioi seingnoriu.
VI		Ab franc vol et ab cor humil
		Soi totz sotz sa seingnoria.
		Ni ai cor qu'eu me·n desapil,
		Si·m dures mil anz ma via;
	55	Que tant vas lieis s'umelia
		Mos cors d'umelian dousor
		Qe·m teing per pagatz de dolor
		Si ia miels no me·n venia;
		Mas midons q'es conoissenz ab prez viu
	60	M'issautz, si·l platz, pos eu tant m'umeliu.
VII		Domna, de vos chant e d'amor,
		De qe·m tenon fol li pluzor;
		Mas ges per fol no·m tenria,
		Qi sabia don mos chantars derriu;
	65	Mas eu am mais que·m teing' hom per auriu.
VIII		Plazenz domna, tot autre ioi esqiu,
		E devas vos mi venon ioi dont uiu.