Aston, S. C.. Peirol. Troubadour of Auvergne. Cambridge: University Press, 1953

Codi: 366,019 Autor: Peirol Gènere: Canso Número: XVIII

 

Mainta gens mi malrazona

I	1	Mainta gens mi malrazona
		quar ieu non chant plus soven.
		E qui d’aisso m’ocaizona
		non sap ges quan longamen
	5	m’a tengut en greu pessamen
		cill que mon cor empreisona,
		don ieu pert esbaudimen,
		tal desconort mi dona.
II		Pero si·m fo douss’ e bona
	10	ma dompn’ al comensamen,
		era no m’acuoill ni·m sona
		mas aissi cum l’autra gen.
		Car conois qu’ieu l’am finamen,
		A! cum mal m’o guizerdona!
	15	Amors fara falhimen
		s’aquest tort li perdona.
III		De tota joia·m desloigna
		ma dompn’ e no·il es honors,
		qu’ab calque plazen messoigna
	20	mi pogr’il far gen socors.
		Ar sai que non es mas folhors
		aquest’ entendensa loigna,
		don ai faich tantas clamors
		q’onta n’ai e vergoigna.
IV	25	Partirai m’en ieu? Non ja,
		que sos pretz e sa valors
		m’o defen e m’o caloigna
		quant ieu cuig amar aillors;
		per tot lo cor m’intra l’amors
	30	si cum fai l’aigu’ en l’espoigna.
		Totz temps mi plaira·l dolors
		cum qe·m destreign’ e·m poigna.
V		Ades vuoill c’amors m’asailla
		e·m guerrei maitin e ser;
	35	contra la soa batailla
		non qier ja repaus aver.
		E s’ieu non ai tot mon voler,
		tals es cella qe·m trebailla
		qu’el mon non a nuill plazer
	40	que lo mieu maltraich vailla.
VI		Lauzenga ni devinailla
		d’enveios no·m cal temer.
		Sol pensiers de lieis no·m failla
		us no m·en pot dan tener;
	45	que·l cossirs don ieu m’alezer
		mi pais mieills d’autra vitailla,
		per qu’ieu non ai en poder
		mos cors neis s’anuailla.
VII		Chansos, a totz potz dir’en ver
	50	qu’en mon chan non agra failla
		si·m volgues d’amor valer
		ma dompna, cui jois vailla.