Aston, S. C.. Peirol. Troubadour of Auvergne. Cambridge: University Press, 1953

Codi: 366,020 Autor: Peirol Gènere: Canso Número: XX

 

M’entencion ai tot’ en un vers mesa

I	1	M’entencion ai tot’ en un vers mesa
		cum valgues mais de chant qu’ieu anc fezes;
		e pot esser que fora mieills apresa
		chansoneta, s’ieu faire la volgues,
	5	mas chantars torn’ en leujaria;
		e vers, qui ben faire·l sabia,
		es ben semblan que degues mais valer,
		per qu’ieu hi vuoill demostrar mon saber.
II		Amors m’auci, tant s’es en mi empresa.
	10	Greus m’es l’afans e·l trebaills on m’a mes;
		tot n’ai perdut deportar e gaiesa
		e, s’anc joi aic, era non sai que s’es.
		De midonz cossir nuoich e dia,
		midonz c’ai dich cum l’apel mia.
	15	Dir’ o puesc ieu, puois mi ven a plazer,
		mas ilh no·m vol ni·m deigna retener.
III		Mal esguardiei son pretz ni sa riquesa
		qan l’enquisi, per que fui folla res.
		Et aic ben dreich, c’una doussa franqesa
	20	mi mostrava ab qe·m lasset e·m pres.
		Gen mi sonava e·m rizia
		qand ieu anava ni venia;
		era m’a si tornat e non caler
		q’apenas sol neis mi deigna vezer.
IV	25	Ja non creirai q’ieu no l’agues conquesa
		s’ieu valgues tant qu’il amar mi degues.
		Ben sui doncs fols, car eu l’am, si be·il pesa!
		Partirai m’en? Ai, dompna, non puosc ges!
		Mas d’una ren vos pregaria,
	30	que no·us fos greu, si no·us plazia.
		Que nuilla res no·m pot del cor mover
		lo desirier que tant n’ai en poder.
V		La gran beutat de lieis ni la dreitesa
		non es nuills hom que trop lauzar pogues.
	35	E mi que val s’ill es pros ni cortesa?
		Qu’ieu muor per lieis e no·ill en pren merces.
		Ben sui fols, qu’ieu ja trobaria
		altra domna que m’amaria.
		Ara sai ieu qe·l reproviers ditz ver;
	40	‘Totz temps vol hom so que non pot aver.’
VI		D’amor mi plaing, mas de nostra marquesa;
		sui mout iratz car la·ns tol Vianes.
		Per lieis es jois mantengutz e proesa,
		qu’es la mieiller dompna c’anc hom saubes,
	45	ni autra non cre qu’el mon sia
		que tant sapcha de cortesia;
		c’apenas pot sos pretz el mon caber
		qu’a totz jorns creis e no·l laissa cazer.
VII		Lo vers es faitz qui l’aprendia.
	50	En Peirols vol que sabutz sia
		en Vianes, on pretz non pot cazer,
		que·l marquesa l’i fai ben mantener.