Aston, S. C.. Peirol. Troubadour of Auvergne. Cambridge: University Press, 1953

Codi: 366,018 Autor: Peirol Gènere: Canso Número: XXV

 

La gran alegransa

I	1	La gran alegransa
		e·l esjauzimen
		que·m gui’ e m’enansa,
		dey faire parven;
	5	quals q’aya pezansa
		ni mal pessamen,
		me vay ses doptansa
		d’amor ben e gen.
		Qu’ieu n’ai tan
	10	de mon talan
		e n’estauc soven
		qu’ieu no aug ni sen.
II		D’estranha maneira
		sol esser amors
	15	salvatg’ e guerreira
		e mala totz jors.
		Ar m’es lauzengeira
		sus totz amadors;
		a pauc de preguieira
	20	m’a fait gent secors.
		Qu’ieu n’ai tan
		de mon talan
		totz l’ans m’es pascors
		e son entre flors.
III	25	Eu ai m’amor miza,
		en tal, fe que·us dey,
		non cug tro en Friza
		que genser n’estey.
		Tant es ben assiza
	30	l’amors cuy m’autrey,
		tot vay a ma guiza
		quant aug e quan vey.
		Qu’ieu n’ai tan
		de mon talan
	35	que, fe que vos dey!
		nulh drut non envey.
IV		Mos joys ses frachura
		entiers e verais
		enans’ e melhura
	40	a totz jornz en ays.
		Tant es fin’ e pura
		l’amors, on m’apays,
		que be m’asegura
		e·m tolh totz esmays.
	45	Non ac tan
		de mon talan,
		ni non fui tan gays
		set ans a e mais.
V		En amor s’entenda
	50	qui pretz vol aver;
		ja per mal que·n senta
		non s’en deu mover,
		mas serv’ e atenda
		q’a tot son plazer
	55	n’aura bon’ esmenda
		sol no·s desesper.
		Qu’ieu n’ai tan
		de mon talan
		e de mon plazer
	60	que·l rey cug valer.
VI		Chanso, ten ta via
		ves los Alvernatz;
		de me non an mia,
		so lor mi digatz,
	65	que·l grans cortezia
		e·l fina beutatz
		e·l joys de m’amia
		m’a say pres el latz.
		Qu’ieu n’ai tan
	70	de mon talan
		qu’en joy et en patz
		am e suy amatz.
VII		De mon chan
		vuelh ab aitan
	75	que sia finatz,
		e chan lo cuy platz.