Eichelkraut, Franz. Der Troubadour Folquet de Lunel. Berlin: W. Weber, 1872

Codi: 154,003 Autor: Folquet de Lunel Gènere: Canso Número: IV

 

No pot aver sen natura

I	1	No pot aver sen natural
		selh que non a retenensa,
		sobre sa ira de far mal,
		quel savis fai per sufrensa
	5	semblar de son gran tort gran dreg
		el fols de son bon dreg naleg,
		quan malamens outra mezura
		vol trop demandar sa drechura.
II		Per nieus o dic, qu’amor lial
	10	port a mi dons ses fallensa,
		sitot a lieys de mi non cal,
		nim mostr’en ren bevolensa,
		ges per tan yraisser nom deg,
		e pus amors lim a eleg,
	15	merces, en cuy mos cors s’atura,
		es metra’n lieys per aventura.
III		Res no monta ni res no val,
		pus hom a lay, on l’agensa,
		meza sa fin’ amor coral,
	20	sitot fay long’ atendensa,
		ques n’irasca nis ne maleg,
		ni quel ne trop hom desadreg,
		que ben leu, sitot l’es escura,
		si dons li port’ amor segura.
IV	25	Donas hi a qu’ab venassal
		semblan porton bevolensa,
		que non auzan traire venal
		lor amor ni lor parvensa,
		tro qu’an proat si de bon dreg
	30	son be d’amor e el destreg
		selhs, en cuy volon ses falsura
		metre lur amor e lur cura.
V		Qui vol amar dona cabal,
		pus a bona captenensa,
	35	ges non la deu gardar engal
		si meteys de far fallensa;
		mas d’us folhs fenhedors hi veg,
		qu’amor non an ni fe ni leg,
		que manta dona cast’e pura
	40	fan encolpar ses forfachura.
VI		Del pro comte de Rodes deg
		ben dir e vuelh e ay ne dreg,
		quar valors e pretz e drechura
		son en luy e sens e mezura.
VII	45	A Lunelh remanc e m’espleg
		ab senhor lial e adreg,
		e quar ma gensers a segura
		valor, mos chans des vers melhura.