Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Estudi introductori
* Bibliografia de l'edició
* Glossari

* Davantal
* Testimonis
* Aparat crític
* Notes
* Traduccions
* Imatges

 

Strempel, Alexander. Giraut de Salignac, ein provenzalischer Trobador. India: Pravana Books, 1916

[CdT en procés d'incorporació]

Codi: 249,002 Autor: Guiraut de Salaignac Gènere: Tenso Número: II

 

En Peironet, vengut m’es en coratge

I 1 „En Peironet, vengut m’es en coratge
    Q’ieu vos deman d’un faich de drudaria
    E si d’amor conoissetz son usatge,
    Digatz m’en ver, e gara·us de foillia:
  5 Cals manten mieills amor, al vostre sen,
    Li huoill o·l cor de cel que leialmen
    Ama sidonz; e cals qe·us n·atalen,
    Vencerai vos, sol la cortz leials sia.“
     
II   „Seigne’n Giraut, el mon non a gramatge
  10 Q’ieu non venqes en plaich de drudaria;
    Car li huoill son totz temps del cor messatge,
    E fan amar cel qe non amaria;
    C’amors non a nuilla ren tant plazen
    Cum son li huoill vas lieis on ant enten,
  15 E·l cor non met aillors son pessamen
    Mas lai on l’oill li mostron que dreit sia.“
     
III   „En Peironet, vos mantenetz follatge,
    Car cel non es ges bons ad ops d’amia
    Que qan la ve, es d’amoros estatge,
  20 E pois de lieis no il soven nuoich ni dia;
    Per que lo cor manten mout mieils joven,
    Qe ve de loing, e l’oill pres solamen.
    Per mi·us o dic, que cel que·m ten gauzen
    Am ab fin cor, loing e pres, on que sia.“
     
IV 25 „Seigne’n Giraut, tuich li ben e·il dampnatge
    Movon per huoills d’amor que c’om vos dia,
    Q’az Andrivet meiron al cor tal rage
    Q’en pres la mort per lieis, cui Dieus maudia!
    Qe s’ab los huoills no la gardes tant gen
  30 Ges per son cor non l’amera nien
    Qe·l cor non a nuill autr’afortimen
    Que am en loc, tro l’uoill mostron la via!“
     
V   „En Peironet, totz hom d’onrat lignatge
    Conois q’el pieitz chausetz en la partia;
  35 Qe tuich sabon, qe·l cor a seignoratge
    Sobre los huoills, et auiatz en cal guia:
    C’amors dels huoills no·i vai si·l cor no·n sen,
    E ses los huoills pot lo cor francamen
    Amar cella q’anc non vic a presen,
  40 Si cum Jaufres Rudels fetz de s’amia.“
     
VI   „Seigne’n Giraut, si l’huoill me son salvatge
    De ma dompna, ja·l cor pro no m·en sia;
    E si·m mostra un semblan d’agradatge,
    Pren mi lo cor e·l met en sa baillia.
  45 Ve·us lo poder del cor e l’ardimen!
    Car per los huoills amors al cor dissen,
    E·il huoil dizon ab semblan d’avinen
    So que lo cor non pot ni ausaria.“
     
VII   „A Peirafuoc tramet mon partimen,
  50 Hon la bella fai cort d’enseinhamen,
    Car beutatz a triat son gay cors gen;
    Lo milhor tenc per bon que qu’ela·n dya.“
     
VIII   „Et ieu volrai per mi al iugamen
    L’onrat castell de Signha el valen,
  55 Car lay estay silh que manten ioven
    E sabra dir cal razon mays valria.“

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI