Strempel, Alexander. Giraut de Salignac, ein provenzalischer Trobador. India: Pravana Books, 1916

[CdT en procés d'incorporació]

Codi: 235,001 Autor: Guillem de Salaignac Gènere: Canso Número: IV

 

A vos cuy tenc per dompn’e per senhor

I	1	A vos cuy tenc per dompn’e per senhor,
		Bona dompna, volgra clamar merce
		Per un’amor que devas vos mi ve,
		Que·m destrenh tan que si·n breu no·m secor
	5	Vostre gens cors, non puesc vius remaner.
		Et anc no vos o auzei far parer,
		E si·us en suy cent vetz vengutz denan,
		Pueys, quan vos vey, no·us aus dir mon talan.
II		Ans qu’ieu vos vis, vos ayc tan fin’ amor
	10	Qu’ieu non amava tant autruy ni me;
		Quant vos vi pueys, doblet l’amors desse,
		E trobiey vos a mos huelhs trop gensor
		Qu’ins e mon cor no sabia voler,
		Tant c’autr’amor mi fetz del cor mover;
	15	Mas la vostra no s’en part tant ni quan,
		Et empero anc non hi ac tan gran.
III		Non esgardetz ves mi vostra ricor!
		Humilitat esgardar hi cove
		Per amor Dieu! E s’autre pro no·m te,
	20	No·m tengua dan, s’ieu vos dic ma clamor;
		Quar ges, dompna, no m’en puesc estener,
		Si·m fors’ amors que·m ten en son poder,
		E de senhor deu hom far son coman,
		Pus que partir no s’en pot tan ni quan.
IV	25	No·m tenguan dan ab vos devinador
		Ni lauzengier, cuy Dieus de malastre!
		Sitot ab lieys qu’enguanet me et se
		Mi tengron dan, pero non fatz clamor;
		Quar anc en re no la·n vim mais valer,
	30	Ni anc despueys no fetz mas decazer,
		Per qu’ieu l’amiey per tostemps a mon dan;
		E do m’a vos lials e ses enjan.
V		El mon non a rey ni emperador
		Que puesc’ aver mais de fin pretz ab se
	35	Que yeu, dompna, si vos mi voletz be,
		Ni·m retenetz per vostre servidor;
		En vos podo complir tug mey voler;
		Mas yeu m’en prenc so que non aus querer,
		A quascun iorn cinc cens bays en pessan,
	40	De que non tem gelos ni mal parlan.
VI		„Pros Comtessa, sobrenom avetz ver,
		Car gen burlatz e metetz vostr’ aver,
		E faitz tezaur de fin pretz benestan,
		C’autra dompna del mon non val aitan.“
VII	45	„Bell’Amia, de vos puesc dir el ver
		Que de fin pretz, d’amics e de poder
		Creisetz totz iorns e·us anatz meilluran.
		Car hom non pot far meills son benestan.“