Strempel, Alexander. Giraut de Salignac, ein provenzalischer Trobador. India: Pravana Books, 1916

[CdT en procés d'incorporació]

Codi: 240,007 Autor: Guiraudo lo Ros Gènere: Canso Número: 3

 

Nulhs hom no sap que s’es grans benanansa

I	1	Nulhs hom no sap que s’es grans benanansa
		S’enans no sap quals es d’amor l’afans;
		E ges per so, bona domna poysans,
		No·m tardasetz hueymais vostra honransa,
	5	S’aver la dey, ni vostres plazers es,
		E si no·us platz, mout val mentirs cortes,
		Et yeu vuelh mais plazen mensonj’ auzir
		Que tal vertat de que tos temps sospir.
II		E s’a vos platz mos bes ni, ma honransa,
	10	Pus vostres so, playria·us mos enans!
		Que ricx honors, on plus es autz ni grans,
		Deu mielhs garar que non prenda mermansa;
		Quar pretz dechai lay on sofranh merces;
		Et yeu volgra qu’uns autres o disses,
	15	Quar vos cuydatz per tal quar vos dezir,
		Qu’eus o digua per mielhs vos covertir.
III		Tant mi fezes plazer vostr’ aconhdansa,
		Qu’eymais mi par que seria enians,
		Si·us plazia ma perda ni mos dans;
	20	Qu’anc pueys no vi vostra desafiansa,
		Pus a vos plac que per vostre·m prezes,
		Ni eu no fi per qu’aver la degues.
		Ans suy vostre trop miels qu’ieu no sai dir,
		Sol quar m’avetz donat de que cossir.
IV	25	Mas quar no·us vey, ai temens’e duptansa
		Que·l vostres cors covinens, benestans,
		Gays e cortes, avinens, ben parlans,
		So ten’ a mal, et estau·n en balansa,
		Quar si destricx m’en ve, el tortz mieus es,
	30	Quar aj estat tant del vostre paes;
		Quar plus soven deuria hom venir
		Lai on hom a a vivr’ et a murir.