De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Codi: 016,013 Autor: Albertet Gènere: Canso Número: LXXVI

 

En amor trob tantz de mals seignoratges

I	1	En amor trob tantz de mals seignoratges,
		Tantz loncs desirs e tantz malvatz usatges,
		Per q’ieu serai de las dompnas salvatges;
		Ni nois cuid’ on qu’eu oimais chant de lor!
	5	Car estat ai lor hom e lor mesatges
		Et enansat lor pretz e lor valor,
		E re no i trob mas destrics e dampnatges;
		Gardatz oimais si dei chantar d’amor!
II		D’amor non chan, ni vuoill aver amia
	10	Bella ni pro ni ab gran cortesia,
		C’anc no i trobiei mas engan e bauzia
		E fals semblan, messongier, trahidor;
		E, qand ieu plus la cuich tener per mia,
		Adoncs la trob plus salvatga e pejor;
	15	Doncs ben es fols totz hom q’en lor si fia;
		Et ieu agui ma part en la follor.
III		Era vejatz de lor amor, si greva:
		Qeill primieira sap hom que fo Na Eva
		Que fetz a Dieu rompre covenz e treva,
	20	Don nos em tuich enqeras pechador;
		Per que fai mal totz hom c’ab ellas treva,
		Puois c’om non pot conoisser la meillor;
		Tals las lauza no sap d’amor qeis leva,
		Ni anc non ac joi, pena ni dolor.
IV	25	El mon non es duchessa ni reina,
		Sim volia de s’amor far aizina,
		Q’ieu lan preses: ni la Contessa fina
		De Proensa, c’om ten per la genzor;
		De Salussa non vuoil que N’Agnesina
	30	Mi retenga per son entendedor,
		Nil contessa Biatritz, sa cosina,
		De Vianes, ab sa fresca color.
V		Si Salvatga, la bella d’Auramala,
		Qe de bon pretz a faich palaitz e sala,
	35	Non s’o tenga ad orguoill ni a tala,
		Non amarai ni lieis ni sa seror,
		Sitot de pretz son en l’aussor escala
		E son fillas d’En Colrat, mon seignor;
		La lor amors m’agra ferit sotz l’ala,
	40	S’amar degues, mas non ai ges paor.
VI		Si N’Azalais de Castel e de Massa
		Que tot bon pretz ajosta et amassa
		M’en pregava, totan seria lassa
		Anz que m’agues conquis per amador;
	45	Dieus! qui la ve com el’es fresca e grassa:
		Sembla rosa novella de pascor;
		E siei beill huoill lanson cairel que passa
		Lo cors el cor ab una gran doussor.
VII		Sim donava s’amor la pros comtessa,
	50	Cill del Carret, q’es de pretz seignoressa,
		Non faria per lieis un’esdemessa;
		Gardatz s’ieu dic gran orguoill ni follor!
		Que jes mos cors plus en dompnas non pessa;
		Oimais lor er a percassar aillor;
	55	Qu’ieu no vuoill jes que neguna m’aguessa
		Colgat ab se, desotz son cobertor.
VIII		Domnas, huimais non voill vostra promessa
		Ni non serai de vos entendedor.
IX		Seign’En Colrat, grans es vostra despessa;
	60	Don poja ades e creis vostra lauzor.