Squillacioti, Paolo. Le poesie di Folchetto di Marsiglia. Pisa: Pacini, 1999.

Nuova edizione riveduta e aggiornata per il "Corpus des Troubadours", 2009.

Codi: 155,001 Autor: Folquet de Marselha Gènere: Canso Número: V

 

Amors, merce: no mueira tant soven

I		Amors, merce: no mueira tant soven,
		que ja·m podes vias del tot ausire;
		que viure·m faitz e morir mesclamen
		et enaissi doblatz me mo martire;
	5	pero, mieg mortz, vos sui hom e servire
		e·l servisis es mi miltans plus bos
		que de null autr' aver rics guizardos.
II		Per qu’er peccatz, Amors, so sabes vos,
		si m’auzizetz, pos vas vos no m’azire;
	10	mas trop servirs ten dan mantas sazos,
		que son amic en pert om, so aug dire:
		qu’ie·us ai servit et encars no m’en vire,
		e quar sabetz qu’al guizardon n’aten,
		ai perdut vos e·l servir eissamen.
III	15	Mas vos, domna, que avetz mandamen
		forzatz Amor e vos cui tan desire,
		non ges per me mas per dreg chausimen,
		e quar plainhen vo·n pregon miei sospire;
		que·l cor plora quan vezes los hueilhs rire,
	20	mas per paor que no·us sembl' enoios
		engan mi eis e trac mal en-perdos.
IV		Non cujera·l vostre cors ergueilhos
		pogues el mieu tan lonc dezir assire;
		mas per paor non fezes d’un dan dos
	25	no vos ausi lo mieu maltrag devire;
		ai! Quar vostr’ ueilh non vezon mon martire?
		qu’adoncs n’agras merce, si doncs no men
		lo dous esgartz que·m fai merce parven.
V		A vos volgra mostrar lo mal qu’ieu sen
	30	et als autres celar e escondire;
		qu’anc no·us puec dir mon cor celadamen;
		donc, s’ieu no·m sai cubrir qui m’er cubrire?
		ni qui m’er fis s’ieu eis me sui traire?
		qui se non sap celar non es razos
	35	que·l celon cill a cui non es nuls pros.
VI		Domna, ·l fin cor qu’ie·us ai no·us sai tot dire,
		mas so qu’ieu lais qu'ieu non dic per non-sen
		restauratz vos en bon entendemen.
VII		Mas N’Azimans ditz qu’ieu li sui traire,
	40	el e·N Tostemps car eu m’en fatz gignos
		quar tot mon cor non retrac ad amdos.