De Bartholomaeis, Vincenzo. Poesie provenzali storiche relative all'Italia. Volume primo con ventiquattro silografie. Roma: Tipografia del Senato, 1931

[CdT en procés d'incorporació]

Codi: 392,025 Autor: Raimbaut de Vaqueiras Gènere: Canso Número: IX

 

No puesc saber per quem sia destretz

I	1	No puesc saber per quem sia destretz
		Ni sai on es Amors qu’om tan mentau,
		Qu’ieu non l’auzi ni non la vei ni l’au,
		Mas, per semblan, mais i truep tortz que dretz;
	5	Mas als clamans l’aug clamar “Amor fina”:
		Veus lo conort quem enuei em destrui
		Em fai amar lieis quem ten pres em fui
		Et, en fugen, m’encaussa em camina.
II		Partir nom puesc, ni no sai estar quetz,
	10	Qu’iram fai dir, gaban, mon talan brau;
		Tan sui destretz qu’iem rancur, car non gau
		Lieys qu’ieu am mais que non amet vasletz
		Guis de Nantuelh la piussel’ Ayglentina;
		E muer aman; tan outracujatz sui
	15	Qu’ar non pod esdirel mariez abdui
		E’ n torn’ a ma et auci sa vezina.
III		E doncx quem val lauzengiars ni abetz?
		Per l’oc reman e per lo non m’esmai;
		Et er m’a far lo conort del bertau,
	20	Cum selh que ditz en chantan En Folquetz;
		Qu’a Cartoza, lai part Alexandrina,
		Queira merce, mas sai no truep refui!
		Et er me grieus sim part de lieis per brui;
		Sol o comens qu’er dans, si no s’afina.
IV	25	Bona dona, fis e francx e adretz
		Vos ai estat e portat vostre lau;
		Parlem abdui planamens e suau
		Et entendetz qu’eus dirai esta vetz:
		Amadaus ai mais qu’Andrieus la reina;
	30	Premeramens que fos mieus ni d’autrui
		Sui ieu vostres, e serai ses tot cui;
		Doncx non es vos ma sor ni ma cozina?
V		Lo jorn quens ac Amors abdos eletz,
		Vostra beutatz me det l’erguelh del pau
	35	Que remiral vert el vermelh el blau,
		Tro per erguelh s’erra de las paretz;
		Aquelh erguelhs lo te tro quel cap clina,
		Que ve sos pes; et ieu contrafas lui,
		Quan vei midons qu’ ab bel semblan m’adui
	40	Gaug et erguelh, trol caps no m’ataïna.
VI		En Proensa, quant encaus ni quant fui,
		Crit : “Monferrat!”, la senha de qu’ ieu fui
		E Cartosa, lai part Alexandrina.