Oroz Arizcuren, Francisco J. La lírica religiosa en la literatura provenzal antigua. Pamplona: Excma. Diputación Foral de Navarra - Institución Príncipe de Viana, 1972.

Edición crítica, traducción, notas y glosario. Versión revisada para Corpus des Troubadours, 2011.

Codi: 248,044 Autor: Guiraut Riquier Gènere: Vers Número: XXV

 

Humils, forfaitz, repres e penedens

I		Humils, forfaitz, repres e penedens,
		entristezitz, marritz de revenir
		so: qu’ay perdut de mon temps per falhir.
		Vos clam merce, dona, verges plazens,
	5	maires de Crist filh del tot poderos,
		que no gardetz cum suy forfaitz vas vos;
		si·us plai, gardatz l’ops de m’arma marrida.
II		Qu’a penas truep nulh peccat de mi mens,
		sal desesper e raubar et aucir;
	10	que dels autres mos cors no·s poc complir,
		don suy avutz mantas vetz mal sabens;
		quar si espers ab bona fe no fos,
		per trops peccatz greus, vils e vergonhos,
		fora m’arma del tot de Dieu partida.
III	15	Mas esper ai que· m siatz vos guirens
		del greu perilh mortal que·m fa marrir,
		de que no puesc per ren ses vos issir:
		tans e tan greus trobi mos fallimens!
		E donc pregatz vostre filh glorïos
	20	que·m fassa far sos plazers e mos pros,
		qu’aissi·m podetz tornar de mort a vida.
IV		Quar Ihezuscristz vos es obedïens
		quan lo pregatz de peccadors guerir,
		sol que·l vuellan be fazen obezir,
	25	per que per mj e per mos benvolens
		e per totz selhs de be far deziros
		vos prec, dona, que·l preguetz qu’elh a nos
		don per anar a lhuy veraya guida.
V		Que·l camis es de comensar cozens,
	30	tant es estreitz et aspres per fromir;
		e quar del mon se fa tan greu partir,
		es del camjs greus sos comensamens;
		e l’acabars es pus greus per un dos:
		tans hi trob’om de passes perilhos
	35	que nuls ses guit no va tro la guandida.
VI		Per nos, dona, verges regina, fos
		maires del filh de Dieu tot poderos:
		doncx acaptatz d’elh a nos esta guida.
VII		Dieu prec del rey de Castella n’Anfos,
	40	que a son cors don honramens e pros
		lonc temps ab grat et espirital vida.